పవన్ కల్యాణ్..వారిని తన పార్టీలో చేర్చుకోరా?

జనసేన పార్టీ విషయంలో కొత్త ప్రచారం తెరపైకి వచ్చింది. ఇది ఒకింత ఆసక్తిదాయకమైన విశేషమైన అంశమే. జనసేన పార్టీ భవిష్యత్తు కార్యాచరణకు సంబంధించిన వ్యవహారం ఇది. జరుగుతున్న ప్రచారం ప్రకారం.. ఇతర పార్టీల నుంచి వచ్చే నేతలకు జనసేనాధిపతి పవన్ కల్యాణ్ తలుపులు మూసేశారట. రాజకీయ ఫిరాయింపులకు, జంప్ జిలానీలకు తన పార్టీలో స్థానం ఇవ్వకూడదని అనుకుంటున్నారట పవన్ కల్యాణ్. గత అనుభవాలను పరిగణనలోకి ఈ నిర్ణయం తీసుకున్నారని సమాచారం.

రాష్ట్రంలో ప్రస్తుతం ఫిరాయింపు రాజకీయాలు మంచి కాక మీద ఉన్న సంగతి తెలిసిందే. వైఎస్సార్ కాంగ్రెస్ పార్టీ నుంచి గెలిచిన దాదాపు 21 మంది ఎమ్మెల్యేలు అధికార పార్టీలోకి ఫిరాయించారు. ఇలా ఫిరాయింపుకు పాల్పడిన వారెవరూ తమ ఎమ్మెల్యే పదవులకు రాజీనామా చేయనే లేదు. ఫిరాయింపు నిరోధక చట్టం ఉన్నా అది కేవలం మాట మాత్రంగా మిగిలింది. తమ పార్టీ నుంచి ఫిరాయించిన వారిపై అనర్హత వేటు వేసే వరకూ తాము అసెంబ్లీకి వచ్చేది లేదని ప్రతిపక్ష పార్టీ హెచ్చరించినా అందుకు తగ్గ ఫలితాలు కనిపించడం లేదు.

ఇలాంటి నేపథ్యంలో మరిన్ని ఫిరాయింపులు ఉంటాయనే వార్తలు కూడా వస్తున్నాయి. ఇదే సమయంలో అధికార తెలుగుదేశం పార్టీ నుంచి, ప్రతిపక్ష వైఎస్సార్ కాంగ్రెస్ పార్టీ నుంచి కూడా జనసేనలోకి వలసలు ఉంటాయనే మాట మొదటి నుంచి వినిపిస్తోంది. ఇప్పటికే అలాంటి జాబితా ఒకటి తయారైంది. తెలుగుదేశంలో, వైఎస్సార్ కాంగ్రెస్ లో పోటీకి అవకాశం దక్కించుకోలేని వాళ్లు.. ఇంకా కొందరు కాపు సామాజికవర్గ నేతలు జనసేన వైపు వెళ్లవచ్చనే ఊహాగానాలున్నాయి.

ఇలాంటి నేపథ్యంలో జనసేన పార్టీ ఇలాంటి జంపింగులకు తలుపులు మూసేసిందని అంటున్నారు. వెనుకటికి చిరంజీవి ప్రజారాజ్యం పార్టీని ఏర్పాటు చేసినప్పుడు కాంగ్రెస్, తెలుగుదేశంల నుంచి చాలా మంది ఆ పార్టీలో చేరారు. ప్రధానంగా కాపు సామాజికవర్గ నేతలు. అయితే ఈ సారి మాత్రం అలాంటి జంపింగులను పవన్ ఎంకరేజ్ చేసే పరిస్థితి లేదని అంటున్నారు. అయితే.. ఇతర పార్టీల నుంచి వస్తామనే నేతలను పూర్తిగా నిరోధించేసి పవన్ పార్టీని నడుపుతారా? మొత్తం కొత్తవాళ్లతోనే సత్తా చాటగలరా? అనేవి ప్రధానమైన ప్రశ్నలే.