దేవాంశ్ ఆడుకోవడానికి అమరావతిలో పార్కులేవీ?

ఆంధ్రప్రదేశ్ రాజధాని అమరావతి అన్ని హంగులను, నిర్మాణాలను కూర్చుకునే దశలో ఉంది. అంతర్జాతీయ నగరం స్థాయిలో దానిని రూపొందించాలనేది ఏపీసీఎం ఆలోచన. అయితే అతనికి ఇప్పుడో చిక్కొచ్చి పడింది. అదేంటంటే... చంద్రబాబుకు రెండేళ్ల మనవడు ఉన్నాడు. అతడు ప్రస్తుతం హైదరాబాద్ లో ఉంటున్నాడు. అమరావతికి వస్తే ఆడుకోవడానికి కనీసం ఒక్క పార్కు కూడా లేదు. దేవాంశ్ కే కాదు, అమరావతిలో ఉన్న చిన్నపిల్లలకు, వృద్ధులకు కూడా ఆహ్లాదంగా కాసేపు గడిపేందుకు ఎక్కడా ఒక్క పార్కు కూడా లేదు. ఇదే విషయాన్ని ఏపీసీఎం చంద్రబాబు అమరావతి డెవలప్మెంట్‌ కార్పొరేషన్ ఎండీ లక్ష్మీపార్థసారథి తో అన్నారు. ఈ విషయాన్ని బుధవారం జరిగిన ఏడు రహదారుల శంకుస్థాపన కార్యక్రమంలో పాల్గొన్న పార్థసారథి అందరికీ చెప్పారు. ఉమ్మడి రాష్ట్రానికి చంద్రబాబు సీఎంగా ఉన్నప్పుడు హైదరాబాద్ లో ఎన్టీఆర్ గార్డెన్ ను నిర్మించామని గుర్తు చేశారు. ఆ రోజున చంద్రబాబు పార్కుని చూసి చాలా ఆనందించారని, టాయ్ కారులో రైడ్ కూడా చేశారని ఆనాటి విషయాలను గుర్తుచేసుకున్నారు.

తాను ఇటీవల సీఎంతో మాట్లాడినప్పుడు ఆయన తన మనవడు అమరావతికి వస్తే ఆడుకోవడానికి ఒక్క పార్కు లేదని అన్నారని చెప్పారు. దానిని బట్టి అమరావతిలో ఉన్న పిల్లలకు పార్కు అవసరాన్ని ఆయన చెప్పారని, తనకు ఏడాది సమయం ఇస్తే పార్కులు నిర్మిస్తానని తెలిపారు. శాఖమూరులో పార్కును నిర్మించబోతున్నామని... అది చిన్నపెద్దా అందరినీ ఆకట్టుకుంటుందని చెప్పారు. దీనికి పక్కనే ఉన్న సీఎం చంద్రబాబు స్పందిస్తూ... మౌళిక వసతులను అభివృద్ధి చేయడంలో పార్థసారథికి మంచి అనుభవం ఉందని మెచ్చుకున్నారు. అమరావతిలో మరో ఏడాదిలో పార్కులు ఏర్పాటైపోతాయన్న మాట.