హైదరాబాద్‌ అభివృద్ధి చేసింది నేనే: పాల్

ఆంధ్రప్రదేశ్ ముఖ్యమంత్రి చంద్రబాబు వల్ల తనకు ప్రాణహాని ఉందని, గత నాలుగున్నర ఏళ్లలో దాదాపు ఏడుసార్లు కుట్రలు చేశారని ప్రజాశాంతి పార్టీ అధ్యక్షుడు, క్రైస్తవ మత బోధకుడు కేఏ పాల్ ఆరోపించారు. గురువారం హైదరాబాద్‌లో విలేకరుల సమావేశంలో మాట్లాడుతూ చంద్రబాబుపై ఆరోపణలు చేశారు.

‘‘ఏపీలో జరుగుతున్న రాక్షస పాలనను అంతం చేయడానికి నేను అన్ని పార్టీల సహకారంతో రాష్ట్రపతిని కలవబోతున్నా. ఏపీలో తక్షణమే రాష్ట్రపతి పాలన తీసుకురావాలని రాష్ట్రపతిని కోరతాం. అసలు హైదరాబాద్‌ను అభివృద్ధి చేసింది నేను. చంద్రబాబు నాయుడు కాదు, ఆయన సీఎం కావడానికే ముందే నేను అభివృద్ధి చేశా’’ అని పాల్ తెలిపారు.
Read also: పవన్ కంటే నాకే ఫాలోయింగ్ ఎక్కువ: కేఏ కేపాల్
ఏపీలో ప్రతిపక్ష నేత జగన్‌పై దాడి, జీఎంసీ బాలయోగి హెలికాప్టర్ ప్రమాదం, ఎర్రన్నాయుడు రోడ్డు ప్రమాదం, లాల్ జాన్ బాషా మరణం తదితర అంశాలపై సీబీఐతో విచారణ జరిపించాలని ప్రధాని నరేంద్ర మోదీని కోరనున్నానని తెలిపారు. డిసెంబరులో పశ్చిమ గోదావరి జిల్లా బీమవరంలో తలపెట్టిన రెండు రోజుల బహిరంగ సభలకు అనుమతి ఇచ్చినట్లే ఇచ్చి వెనక్కి తీసుకున్నారని, తాజాగా మళ్లీ దరఖాస్తు చేయాలంటూ ఆటంకాలు సృష్టిస్తున్నారని పాల్ అన్నారు.