జాతీయ రాజకీయాల్లోకి వెళ్లే ఆలోచన లేదు: కేసీఆర్

రాష్ట్రంలో అన్ని వర్గాల ప్రజలు చిరునవ్వుతో ఉండాలన్నదే తమ ప్రభుత్వ లక్ష్యమని సీఎం కేసీఆర్ అన్నారు. తెలంగాణ అనేక రంగాల్లో నంబర్‌ వన్‌గా ఉందని చెప్పారు. కోకాపేటలో గొల్ల, కురుమ సంక్షేమ భవనాలు, హాస్టల్ భవనానికి ఆయన శుక్రవారం (డిసెంబర్ 29) శంకుస్థాపన చేశారు. ఈ సందర్భంగా ఏర్పాటు చేసిన బహిరంగ సభలో మాట్లాడుతూ.. గొల్ల, కురుమ జాతి అత్యధికంగా ఉన్న తెలంగాణ భారతదేశానికి దిక్సూచి కావాలని సూచించారు. రాష్ట్రంలో మొత్తం 35 లక్షల గొర్రెలు పంపిణీ చేశామని, వీటితో యాదవులు వేల కోట్ల సంపదను సృష్టించబోతున్నారని తెలిపారు. ఇకపై తెలంగాణ నుంచే గొర్రెలు ఎగుమతి అయ్యే పరిస్థితి రావాలని ఆయన ఆకాంక్షించారు.

బీసీలకు అన్ని రంగాల్లో అవకాశాలు కల్పిస్తామని, తెలంగాణ కురుమ సంఘం అధ్యక్షుడు ఎగ్గే మల్లేశంకు ఎమ్మెల్సీ పదవి ఇస్తామని కేసీఆర్ తెలిపారు. జనవరి 1 నుంచి వ్యవసాయానికి 24 గంటల విద్యుత్‌ ఇస్తామని పునరుద్ఘాటించారు. ఈ సందర్భంగా మాట్లాడుతూ.. తనకు జాతీయ రాజకీయాలపై ఆసక్తి లేదని చెప్పారు.

‘ఈ మధ్య ఢిల్లీలో కేంద్ర హోంమంత్రి రాజ్‌నాథ్ సింగ్‌ను కలిశా. కేసీఆర్ సాబ్ మీ ప్రభుత్వం రైతులకు ఏడాదికి ఎకరాకు రూ. 8000 పెట్టుబడి ఇస్తుందటగా అని ఆయన అడిగారు. అవునండీ కొత్త రాష్ట్రం మాది.. ఉమ్మడి రాష్ట్రంలో మా రైతులు చాలా నష్టపోయారు. వారిని ఆదుకోవాడానికే ఈ నిర్ణయం తీసుకున్నాం అని నేను చెప్పా. మరి దాన్ని రైతులు తిరిగి ఎలా చెల్లిస్తారు? అని ఆయన మరో ప్రశ్న వేశారు. ఒక్క పైసా కూడా చెల్లించనవసరం లేదు, అంతా మాఫీయే అని నేను చెప్పేసరికి ఆయన నోరెళ్లబెట్టారు’ అని కేసీఆర్ చెప్పారు.

‘అభివృద్ధిలో తెలంగాణ దూసుకుపోతోంది కదా.. కేంద్ర రాజకీయాల్లోకి వచ్చే ఆలోచన ఏమైనా ఉందా కేసీఆర్ అని రాజ్‌నాథ్ నన్ను అడిగారు. అలాంటి ఆలోచన ఏమీ లేదు.. ఈ జన్మకు నా తెలంగాణ ప్రజలకు సేవ చేసుకుంటా.. తెలంగాణలోనే ఉంటా.. అని నేను హోమ్‌ మంత్రి రాజ్‌నాథ్‌కు చెప్పా’ అంటూ ఢిల్లీ ముచ్చట చెప్పుకొచ్చారు కేసీఆర్.