థర్డ్ ఫ్రంట్ కాదు.. భారత ప్రజల ఫ్రంట్: కేసీఆర్

తెలంగాణ అసెంబ్లీలో గవర్నర్ ప్రసంగానికి ధన్యవాద తీర్మానంపై చర్చ సందర్భంగా సీఎం కేసీఆర్ మాట్లాడారు. ఈ సందర్భంగా రిజర్వేషన్ల అంశంపై మాట్లాడుతూ.. తాను దేశ రాజకీయాల్లోకి ఎందుకు వెళ్లాలనుకుంటున్నారో వివరించారు. భారత రాజకీయాల్లోకి పోవాలనుకోవడం వెనుక పెద్ద ఎజెండా ఉందని తెలిపారు.

‘నేను జాతీయ రాజకీయాల్లోకి పోతానని ప్రకటించిన తర్వాత కొంతమంది తప్పుగా అర్థం చేసుకుంటున్నారు. ఓ మూడు, నాలుగు ప్రాంతీయ పార్టీలను ఏకం చేసి థర్డ్ ఫ్రంట్ అని కథ నడుపుతాడని ప్రచారం చేస్తున్నారు. కానీ, నా లక్ష్యం అది కాదు. చిల్లర రాజకీయాల కోసం ఢిల్లీ వైపు పోవడం లేదు’ అని కేసీఆర్ చెప్పారు.

‘ఇది థర్డ్ ఫ్రంట్ కాదు.. ఇంకో ఫ్రంట్ కాదు. భారత ప్రజల కింద నేను ప్రతిపాదించబోయే ఫ్రంట్ వస్తుంది. నేను తెలంగాణ ఉద్యమం మొదలుపెట్టిన నాడు కూడా ఇలాగే ఎగతాళి చేశారు. కానీ, విజయం సాధించాం.. ఆవిధంగానే ఈ ఫ్రంట్ కూడా విజయం సాధిస్తుంది. అప్పుడే మనం అనుకున్న రిజర్వేషన్లను సాధించుకోవచ్చు. ఎస్సీ, ఎస్టీలు బాగుపడుతారు’ అని కేసీఆర్ అన్నారు.