ఏపీలో మీ సేవ‌ల్లోనూ ఆధార్ సేవ‌లు

ఆధార్‌ సేవలు పొందడంలో ఎదురవుతున్న ఇబ్బందులకు త్వరలోనే ఫుల్‌స్టాప్‌ పడనుంది. రాష్ట్ర వ్యాప్తంగా ఉన్న అన్ని మీ-సేవా కేంద్రాల్లో తప్పనిసరిగా ఆధార్‌ నమోదు, సవరణలు చేపట్టాలని మీ-సేవా ఉన్నతాధికారులు ఆదేశాలు జారీచేశారు. అందుకు కావాల్సిన పరికరాలను కొనుగోలు చేయాలని సూచించారు. దీంతో రాష్ట్రవ్యాప్తంగా 6 వేల మీ-సేవా కేంద్రాల్లో ఇకమీదట ఆధార్‌ నమోదు, సవరణలు చేసుకోవచ్చు. పోస్టాఫీసులు, బ్యాంకులు కూడా ముందుకొస్తే ఆహ్వానిస్తామని మీ-సేవా డైరెక్టర్‌ సుందర్‌ గురువారం మీడియాకు తెలిపారు.


ప్రధాన ఈ-సేవా కేంద్రాలు, మీ-సేవా కేంద్రాలకు గతంలో అనుమతులిచ్చినా పనిభారం పూర్తిస్థాయిలో అమలు కావడం లేదు. ఏపీ ఆన్‌లైన్‌ నిర్వాహకులంతా ఇటీవల ఐటీ శాఖ మంత్రి నారా లోకేశ్‌ను కలిసి సమస్యను వివరించారు. లోకేశ్‌ దీనికి సానుకూలంగా స్పందించి యూఐడీఏఐకి లేఖ రాశారు. ఏపీ ఆన్‌లైన్‌ సెంటర్లకు కూడా అవకాశం కల్పించాలని మీ-సేవా ఉన్నతాధికారులు సైతం యూఐడీఏని కోరారు. దీనికి స్పందించిన యూఐడీఏఐ ఏపీ ఆన్‌లైన్‌ సెంటర్లన్నీ మీ-సేవ పరిధిలో రిజిస్టర్‌ అయితే అనుమతులు ఇస్తామని చెప్పింది.