రాష్ట్రానికి మరో సైనిక్ స్కూల్..

రాష్ట్రానికి మరో సైనిక్‌ స్కూల్‌ మంజూరైంది. ఇప్పటికే వరంగల్‌ సమీపంలో ఒకటి ఏర్పాటు కానుండగా.. తాజాగా మహబూబ్‌నగర్‌ జిల్లా నారాయణపేటలో మరో సైనిక్‌ స్కూల్‌ ఏర్పాటు చేసేందుకు రక్షణ శాఖ సూత్రప్రాయంగా అంగీకారం తెలిపింది. తమ ప్రాంతం వెనకబడి ఉందని, అక్కడి వారికి నాణ్యమైన విద్య అందించేందుకు సైనిక్‌ స్కూల్‌ ఏర్పాటు చేయాలని ఇటీవల మహబూబ్‌నగర్‌ ఎంపీ జితేందర్‌రెడ్డి కేంద్ర ప్రభుత్వాన్ని కోరారు. ఆయన వినతిని పరిగణనలోకి తీసుకున్న కేంద్రం.. 50 ఎకరాల స్థలాన్ని ఎంపిక చేస్తే పరిశీలిస్తామని తెలిపింది. మహబూబ్‌నగర్‌ జిల్లా నారాయణపేట ప్రాంతంలో 50 ఎకరాల స్థలం ఉందని కలెక్టర్‌ పాఠశాల విద్యాశాఖకు నివేదిక ఇవ్వడంతో.. అధికారులు దాన్ని కేంద్రానికి పంపారు.

సైనిక్‌ స్కూల్‌కు దాదాపు రూ.100 కోట్ల వరకు నిధులు అవసరమవుతాయి. మౌలిక వసతుల కల్పన, వేతనాలు, నిర్వహణ తదితరాలన్నింటికీ రాష్ట్ర ప్రభుత్వమే నిధులు మంజూరు చేయాలి. రక్షణ శాఖ అధికారులు సిబ్బందిని నియమిస్తారు. సీబీఎస్‌ఈ సిలబస్‌తో 6-12 తరగతులు నిర్వహిస్తారు.

మరోవైపు గత ఏడాది వరంగల్ జిల్లాకు మంజూరైన సైనిక్‌ స్కూల్‌ ఏర్పాటులో జాప్యం జరుగుతోంది. ధర్మసాగర్‌ మండలం ఎలుకుర్తిలో దీన్ని ఏర్పాటు చేయాలని విద్యాశాఖ నిర్ణయించింది. ఆ స్థలానికి రక్షణ శాఖ అధికారుల ఆమోదం కూడా వచ్చింది. అయితే.. 50 ఎకరాల స్థలంలో కొంత అసైన్డు భూమి ఉండటంతో రైతులకు మరో రూ.5 కోట్ల వరకు చెల్లించాల్సి ఉంది. ఈ నిధులు మంజూరై కొన్ని భవనాలు సిద్ధమైతేనే, వచ్చే విద్యా సంవత్సరం నుంచి తరగతులు మొదలవుతాయి.