రెండేళ్ల బాలుణ్ని మింగిన నాలా

హైదరాబాద్ మహానగరంలోని ఓ మురికి కాలువ (నాలా) రెండేళ్ల బాలుణ్ని మింగేసింది. పాతబస్తీలోని రెయిన్ బజార్ పోలీస్ స్టేషన్ పరిధిలో మౌలాకా చిల్లా ప్రాంతానికి చెందిన కయామిల్లా అబ్బాస్ కుమారుడు జాకీ అబ్బాస్ (2) శనివారం ఇంటి ముందు ఆడుకుంటూ ప్రమాదవశాత్తు నాలాలో పడిపోయాడు. ఓపెన్‌గా ఉన్న ఈ డ్రైనేజీ నాలాలో అబ్బాస్ పడిపోవడాన్ని ఎవరూ గమనించలేదు.

కొడుకు కనబడకపోవడంతో సుమారు గంటపాటు వెతికిన తల్లితండ్రులు చివరిగా నాలాలో వెతికారు. అక్కడ అబ్బాస్ మృతదేహాన్ని చూసి షాకైన తల్లిదండ్రులు గుండెలవిసేలా ఏడ్చారు. అప్పటి వరకు ఇంటిముందే ఆడుకున్న చిట్టితండ్రి ఒక్కసారి శవమై కనబడటంతో బోరున విలపించారు. విషయం తెలుసుకున్న రెయిన్ బజార్ పోలీసులు సంఘటన స్థలానికి చేరుకుని విచార మొదలుపెట్టారు. బాబు ప్రమాదవశాత్తు నాలాలో పడిపోయి చనిపోయినట్లు కేసు నమోదు చేసుకున్నారు.