​మోడీతో పవన్ కల్యాణ్ కు సంబంధం లేనట్టే!

తన పార్టీ ఎన్డీయేలో లేదు.. అని ప్రకటించాడు జనసేన అధినేత పవన్ కల్యాణ్. కేంద్రంలో అధికారాన్ని కలిగి, వివిధ రాష్ట్రాల అసెంబ్లీ ఎన్నికల్లో సంచలన విజయాలు సాధిస్తూ సత్తా చాటుతున్న.. ఎన్డీయేలో తన పార్టీ భాగస్వామి కాదని పవన్ క్లారిటీ ఇచ్చాడు. తద్వారా ప్రధాని మోడీతో కూడా తనకు రాజకీయ సంబంధాలు ఏమీ లేనట్టే అని పవన్ కల్యాణ్ స్పష్టం చేశాడు. ‘జనసేన’ అధికార కూటమిలో భాగస్వామి కాదని చెప్పాడు.

2014 లోక్ సభ, అసెంబ్లీ సార్వత్రిక ఎన్నికల్లో భారతీయ జనతా పార్టీ తరపున పవన్ కల్యాణ్ ప్రచారం చేశాడని వేరే చెప్పనక్కర్లేదు. ఏపీ, తెలంగాణల్లో జరిగిన వివిధ సభల్లో కూడా మోడీ, చంద్రబాబులతో కలిసి పవన్ వేదికను పంచుకున్నాడు. ఆ కూటమిని గెలిపించాలని ప్రచారం చేశాడు. ఒక దశలో పవన్ కల్యాణ్ కు బీజేపీ రాజ్యసభ సభ్యత్వం ఇస్తుందని కూడా ప్రచారం జరిగింది. అయితే అది వాస్తవం కాలేదు. తదనంతర కాలంలో వివిధ సందర్భాల్లో భారతీయ జనతా పార్టీని పవన్ కల్యాణ్ విమర్శిస్తూ వస్తున్నాడు. తెలుగుదేశం పార్టీపై సానుకూల ధోరణితోనే సాగినా.. బీజేపీని మాత్రం విమర్శించాడు జనసేనాధినేత.

తాజాగా జనసేన మూడో వార్షికోత్సవం సందర్భంగా మాత్రం.. తన పార్టీ ఎన్డీయేలో లేదని స్పష్టం చేశాడు. మరోవైపు పవన్ కల్యాణ్ తో జత కట్టడానికి లెఫ్ట్ పార్టీలు ఆసక్తి చూపుతున్నాయి. ఇది వరకూ తెలుగు రాష్ట్రాలకు చెందిన కమ్యూనిస్టు పార్టీల నేతలతో పవన్ కల్యాణ్ సమావేశం అయ్యాడు కూడా. మరి పవన్ కల్యాణ్ తను ఎన్డీయేలో లేనని చెప్పడం కమ్యూనిస్టు పార్టీలకు ఉత్సాహాన్ని ఇచ్చేదే.