పవన్ ఆ విషయంపై క్లారిటీ ఇస్తాడా?

నేటి నుంచి అనంతపురం జిల్లాలో పర్యటిస్తున్నారు జనసేన అధినేత పవన్ కల్యాణ్. గత నాలుగేళ్ల సమయంలో పవన్ అనంతపురం వెళ్లడం ఇది రెండోసారి. గత సార్వత్రిక ఎన్నికలు ముగిసిన తర్వాత దాదాపు రెండేళ్ల కిందట పవన్ అనంతపురం వెళ్లొరు ఒకసారి. ఆ సమయంలో తను ఆ జిల్లా నుంచినే పోటీ చేస్తానని పవన్ ప్రకటించారు. వచ్చే ఎన్నికల్లో తన పార్టీ ప్రత్యక్ష పోటీలో ఉంటుందని ప్రకటించిన పవన్.. తను అనంతపురం జిల్లా నుంచి పోటీ చేస్తానని అన్నారు. అయితే ఆ జిల్లాలోని ఏ నియోజకవర్గం నుంచి పోటీ అనే అంశంపై మాత్రం పవన్ క్లారిటీ ఇవ్వలేదు.

ఆ తర్వాత కూడా పలు సందర్భాల్లో తన ప్రత్యక్ష పోటీ అనంతపురం జిల్లా నుంచినే అని పవన్ అన్నారు. ఈ నేపథ్యంలో ఇప్పుడు ఆయన అనంతపురం జిల్లాలో పర్యటిస్తున్నారు. మరి ఇప్పుడు ఆయన నియోజకవర్గం విషయంలో క్లారిటీ ఇస్తారా? అనేది ఆసక్తిదాయకమైన అంశం.

ఎన్నికలకు మరెంతో సమయం లేదు.. ఈ నేపథ్యంలో ప్రత్యక్ష పోటీ విషయంలో నియోజకవర్గం విషయంలో పవన్ క్లారిటీ ఇస్తే అది ఆసక్తిదాయకమైన అంశమే అవుతుంది. ఆ నియోజకవర్గంపై అందరి కన్నూ పడుతుంది. మరి పవన్ ఈ విషయంలో క్లారిటీ ఇస్తారా? తను ఎక్కడ నుంచి పోటీ చేసే అంశంపై పవన్ స్పష్టతను ఇస్తారా? అనంతపురం నుంచి ప్రత్యక్ష పోటీ అని ఇది వరకూ ప్రకటించిన అంశంపై పవన్ ఎలా స్పందించబోతున్నారు? అనేవి ఆసక్తిదాయకమైన అంశాలు.