పవన్‌కు లేఖ రాసి వీరాభిమాని ఆత్మహత్య

సినీ నటుడు, జనసేన పార్టీ అధ్యక్షుడు పవన్‌ కల్యాణ్‌ వీరాభిమాని అనిల్ కుమార్ ఆత్మహత్య చేసుకున్నాడు. ఈ ఘటన విజయవాడలో విషాదాన్ని నింపింది. కృష్ణా జిల్లా విజయవాడకు చెందిన కొమరవల్లి అనిల్‌ కుమార్‌ పవర్ స్టార్ పవన్ కల్యాణ్‌కు వీరాభిమాని. నగరంలోని తల్‌వాకర్స్ జిమ్ ట్రైనర్‌గా పనిచేస్తూ జీవనం సాగించేవాడు. అయితే ఎన్నో పర్యాయాలు యత్నించినా తన ఆరాధ్య హీరోను కలుసుకోలేకపోయాడు అనిల్. జనసేన కార్యక్రమాలపై అనిల్ ఆసక్తి చూపించేవాడు.

గత కొంతకాలం నుంచి డిప్రెషన్‌లో ఉన్న అనిల్ కుమార్ సోమవారం ఇంట్లో ఎవరూ సమయంలో ఫ్యాన్‌కు ఉరేసుకుని బలవన్మరణం చెందాడు. అయితే చనిపోయే ముందు అభిమాన నటుడు పవన్‌కు లేఖ రాశాడు. బతికుండగా ఆయనను కలుసుకోలేక పోయాయనని.. తాను చనిపోయిన తర్వాత పవన్ తనను చూసేందుకు రావాలని కోరాడు. అదే విధంగా అంత్యక్రియలు సైతం పవన్ చేతులమీదుగా జరిపించాలని లేఖలో రాశాడు. అనిల్ ఆత్మహత్యపై కేసు నమోదు చేసిన పోలీసులు మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. మితి మీరిన అభిమానం ప్రాణాలు తీసిందంటూ అనిల్ బంధువులు, సన్నిహితులు కన్నీరు మున్నీరుగా విలపించడం స్థానికులను కలచివేస్తోంది.