జేఎఫ్‌సీ: రఘువీరాకు పవన్ ఫోన్.. విపక్షాలకు ఆహ్వానం

జనసేన అధినేత పవన్ కళ్యాణ్ వేగం పెంచారు. ఆంధ్రప్రదేశ్ ప్రభుత్వానికి కేంద్ర ఇచ్చిన నిధులపై లెక్కలు తేల్చేందుకు ‘జాయింట్ ఫ్యాక్ట్ ఫైండింగ్ కమిటీ’ (జేఎఫ్‌సీ)ని ఏర్పాటుచేసిన పవన్.. దాని కిందకి అన్ని పార్టీలను తీసుకొచ్చే ప్రయత్నం చేస్తున్నారు. ఇప్పటికే జేఎఫ్‌సీతో కలసి పనిచేయడానికి లోక్‌సత్తా అధినేత జయప్రకాష్ నారాయణ, కాంగ్రెస్ మాజీ నేత ఉండవల్లి అరుణ్ కుమార్ సుముఖత వ్యక్తం చేసిన సంగతి తెలిసిందే. వీరిద్దరితో పవన్ ఇప్పటికే చర్చలు కూడా జరిపారు.

ఇదిలా ఉంటే, ఫిబ్రవరి 16న హైదరాబాద్‌లో జేఎఫ్‌సీ సమావేశాన్ని పవన్ నిర్వహిస్తున్నారు. ఈ సమావేశానికి హాజరుకావాల్సిందిగా ఏపీసీసీ అధ్యక్షుడు రఘువీరారెడ్డిని పవన్ కళ్యాణ్ ఆహ్వానించారు. పవన్ స్వయంగా రఘువీరారెడ్డికి ఫోన్ చేసి సమావేశం గురించి చెప్పారు. అయితే తనకు వీలుపడదని, తన బదులు ఏపీసీసీ జనరల్ సెక్రటరీలు జంగా గౌతమ్, గిడుగు రుద్రరాజు హాజరవుతారని రఘువీరా చెప్పారు. రఘువీరాతో పాటు సీపీఎం రాష్ట్ర కార్యదర్శి పి.మధు, సీపీఐ కార్యదర్శి కె.రామకృష్ణలను కూడా పవన్ ఆహ్వానించారు. రేపటి సమావేశానికి వీరంతా హాజరవుతారు. ఈ సమావేశంలో ఉండవల్లి అరుణ్ కుమార్, జయప్రకాష్ నారాయణ కీలక పాత్ర పోషించనున్నారు.

కాగా, ప్రభుత్వాన్ని పవన్ కళ్యాణ్ శ్వేతపత్రంపై అడగటంపై సీఎం చంద్రబాబు స్పందించినట్లు సమాచారం. గురువారం విజయవాడలో జరిగిన టీడీపీ సమన్వయ సమావేశంలో పవన్ ప్రస్తావనను చంద్రబాబు తీసుకొచ్చారు. పవన్ శ్వేతపత్రం అడగటంపై స్పందిస్తూ ‘కేంద్రం ఏమిచ్చిందో, ఎంత ఖర్చు చేశామో అన్ని లెక్కలు పారదర్శకంగా వెబ్‌సైట్‌లో పెట్టాం. ఇంకా ఆయనకు కొత్తగా ఇచ్చేదేముంది. ప్రత్యేక హోదాకు, ప్రత్యేక ప్యాకేజీకి పెద్ద తేడా లేదని ప్రజలకు అర్థమయ్యేలా చెప్పండి’ అని పార్టీ నేతలకు బాబు చెప్పినట్లు సమాచారం. ఫిబ్రవరి 15 నాటికి కేంద్ర ఇచ్చిన నిధులు, రాష్ట్ర ఖర్చు చేసిన మొత్తంపై శ్వేతపత్రం విడుదల చేయాలని ఇప్పటికే పవన్ డెడ్‌లైన్ పెట్టిన సంగతి తెలిసిందే.