జనసేన ఆవిర్భావ సభ వద్ద ఉద్రిక్తత

గుంటూరు ‘జనసేన’ ఆవిర్భావ సభ వద్ద ఉద్రిక్త పరిస్థితులు నెలకొన్నాయి. పవర్ స్టార్ పవన్ కళ్యాణ్ అభిమానులు మరోసారి కంట్రోల్ తప్పారు. గుంటూరు జిల్లా నాగార్జున యూనివర్శిటీ ఎదుట గల ప్రాంగణంలో ఈరోజు సాయంత్రం 5:30 గంటలకు ప్రారంభమైన ఈ భారీ బహిరంగ సభకు పవన్ అభిమానులు, జనసేన కార్యకర్తలు లక్షలాదిగా హాజరయ్యారు. సాంస్కృతిక కార్యక్రమాలు ఇప్పటికే ప్రారంభం కాగా.. కొద్దిసేపటి క్రితమే పవన్ సభస్థలికి చేరుకోన్నారు. దీంతో పవన్ కళ్యాణ్‌ను దగ్గర నుండి చూడాలనే ఉత్సాహంలో వేదిక దగ్గరకు వెళ్లే ప్రయత్నంలో అభిమానుల మధ్య తోపులాట చోటుచేసుకుంది. ఈ తోపులాటలో పలువురు పవన్ ఫ్యాన్స్‌తో పాటు ఒక కానిస్టేబుల్‌కి గాయాలుకాగా ఆసుపత్రికి తరలించారు.

ఒక్కసారిగా స్టేజ్ వైపుకు దూసుకువచ్చిన పవన్ అభిమానుల తాకిడికి బారికేడ్లు ద్వంసమయ్యాయి. మహిళల గ్యారీల్లోకి దూసుకెళ్లిన జనసేన కార్యకర్తలను అదుపు చేసేందుకు పోలీసులు లాఠీలకు పనిచెప్పి పరిస్థితిని అదుపులోకి తెచ్చారు. కాగా కాసేపట్లో పవన్ వేదిక వద్దకు చేరుకుని పార్టీ విధి, విధానాలు, భవిష్యత్తు కార్యాచరణపై అధినేత కీలక ప్రకటనలు చేసే అవకాశం ఉందని పార్టీ వర్గాలు భావిస్తున్నాయి.