నిరాయుధుడైన రంగా హత్య తప్పు: పవన్ కల్యాణ్

మూడు రోజుల పర్యటనలో ఉన్న జనసేనాని పవన్ కళ్యాణ్ విజయవాడలో నిర్వహించిన సభలో జనసేన కార్యకర్తలను ఉద్దేశించి ప్రసంగించారు. ఏపీలో ముఖ్యంగా, విజయవాడలో సామాజిక వర్గాల మధ్యనున్న ఆధిపత్య పోరు గురించి పవన్ ఆకట్టుకునేలా మాట్లాడారు. వంగవీటి రంగా గురించి మాట్లాడకుండా.. విజయవాడ రాజకీయాలను మార్చాలి. నిరాయుధుడిగా ఉన్న ఆయన హత్య ఒక తప్పయితే.. ఆయన హత్యతో సంబంధం లేని కుటుంబాలెన్నో నలిగిపోయాయి. అందులో కమ్మ, కాపు, అన్ని రకాల వ్యక్తులు ఉన్నారు. హత్యల పర్యావసానం చాలా బాధను కలిగిస్తుందని పవన్ తెలిపారు.

నేను నెల్లూరులో పెరిగాను. అక్కడ నా కులమేంటని నన్నెవరూ అడగలేదు. హైదరాబాద్‌లో ఉంటున్నా. అక్కడెవరూ నా కులం అడగలేదు. కానీ ఈ రోజుకీ, ఇంకా విజయవాడ మారలేదు. మనందరం ఆలోచించాలి. హైదరాబాద్ నుంచి ఇక్కడ సెటిల్ కావడానికి వచ్చిన ఓ వ్యక్తి ఆరు నెలలు ఉండి వెళ్లిపోయాడు. ఇక్కడ నా కులమేంటని అడుగుతున్నారని ఆయన వాపోయారని పవన్ చెప్పాడు. అభివృద్ధి చెందినా.. కులం ఉచ్చులోనే విజయవాడ చిక్కుకుపోయిందన్నారు.

వంగ వీటి రంగా హత్య సమయంలో ఉన్నదీ తెలుగు దేశం ప్రభుత్వమే. ఆయన హత్య తర్వాత మిగతా కులాల వాళ్లు కమ్మ వాళ్లపై దాడి చేశారు. రాష్ట్ర విభజన తర్వాత కూడా కులాల అంతరాన్ని అధిగమించాలి. ప్రపంచ స్థాయి రాజధాని కోసమే టీడీపీకి మద్దతునిచ్చానని పవన్ తెలిపారు.