​పవన్ కల్యాణ్ కు ట్విటర్ కష్టాలు..!

తన ట్విటర్ అకౌంట్ హ్యాక్ కు గురి అయ్యిందని ఆ మధ్య జనసేన అధినేత పవన్ కల్యాణ్ ప్రకటించారు. దాదాపు ఇరవై రోజుల నుంచి పవన్ ట్విటర్ ఖాతా నుంచి ఎలాంటి అప్ డేట్స్ లేవు. మరి పవన్ కు, అభిమానులకు, పవన్- మీడియాకు మధ్య ఏదైనా అనుసంధానంగా ఉన్నది ఆ ట్విటర్ ఖాతా మాత్రమే. మరి అది కూడా మూగబోవడంతో పవన్ నుంచి ఏ విషయం మీదా అప్ డేట్స్ లేకుండా పోయాయి.

భారతీయ జనతా పార్టీ జాతీయాధ్యక్షుడు తెలుగు రాష్ట్రాల పర్యటన మీద కూడా పవన్ స్పందనకు అవకాశం లేకుండా పోయింది. ఒకవేళ ట్విటర్ ఖాతా యాక్టివ్ గా ఉండి ఉంటే.. పవన్ ఏమైనా స్పందించే వారేమో! ఇంతకీ పవన్ ట్విటర్ అకౌంట్ ను ఎవరు హ్యాక్ చేశారు? ఎందుకు చేశారు? అంటే ఆసక్తికరమైన వార్తలు వస్తున్నాయి.

పవన్ ట్విటర్ అకౌంట్ బాధ్యతలు చూసే ఒక ఉద్యోగిని ఇటీవల తొలగించారని.. అకౌంట్ కు సంబంధించిన పాస్ వర్డ్, ఈమెయిల్, మొబైల్ నంబర్.. అన్నీ ఆ ఉద్యోగి వద్దే ఉండిపోయాయని.. దీంతో అకౌంట్ లోకి లాగిన్ కావడానికి వీలు లేకుండా పోయిందని వార్తలు వస్తున్నాయి. సదరు మాజీ ఉద్యోగి ఎక్కడున్నాడో పట్టుకోవడానికి ప్రయత్నిస్తున్నా.. అతడు అందుబాటులో లేడట. దీంతో.. పవన్ ట్విటర్ ఖాతా నిలిచిపోయింది. ప్రత్యేకంగా ఎవరూ హ్యాక్ చేయకపోయినా.. ఈ విధంగా లాక్ అయిపోయింది పవన్ అకౌంట్.

మరి ఇప్పుడు మళ్లీ కొత్త ఖాతాను తెరవడం సమస్య కాదు.. కానీ మళ్లీ ఫాలోయర్లు ఏర్పడటానికి సమయం పడుతుంది. రెండు అకౌంట్లు కన్ఫ్యూజన్ ను క్రియేట్ చేస్తాయి. పవన్ ప్రస్తుత అకౌంట్ కు దాదాపు 18 లక్షల మంది ట్విటర్ ఫాలోయర్లున్నారు. కొత్త అకౌంట్ తో మళ్లీ అంతమందిని సంపాదించుకోవాలంటే చాలా సమయమే పడుతుంది. దీంతో ప్రస్తుత అకౌంట్ నే యాక్టివేట్ చేసే యత్నాల్లో ఉన్నారట.