​పవన్ మద్దతు మరోసారి టీడీపీకేనా...?

నంద్యాల ఉప ఎన్నికల విషయంలో అధికార, ప్రతిపక్ష పార్టీలు తమదైన రీతిలో వ్యూహాలు పన్నుతున్నాయి. ఈ ఉప ఎన్నికల్లో మిగతా పార్టీల పాత్ర ఏమిటి? అనేది కూడా చర్చనీయాంశమే. రాష్ట్రంలో కాంగ్రెస్, కమ్యూనిస్టుపార్టీలు, జనసేన.. అంతో ఇంతో హడావుడిని చేస్తున్నాయి. మరి ఏ పార్టీ అయినా ఎన్నికల్లో పోటీ చేసినప్పుడే వాటి సత్తా ఏమిటో తెలుస్తుంది. వాటి పై ప్రజాభిప్రాయం ఎలా ఉందో అర్థం అవుతుంది. ఈ నేపథ్యంలో.. నంద్యాల ఉప ఎన్నికల్లో అవెలా వ్యవహరించబోతున్నాయనేది ఆసక్తికరంగా ఉంది.

ముందుగా కాంగ్రెస్ విషయానికి వస్తే.. నంద్యాల్లో ఆ పార్టీ తరపున అభ్యర్థి బరిలో ఉండే అవకాశాలు కనిపిస్తున్నాయి. ఎవరు? అనేది ఇంకా తేలలేదు కానీ, అక్కడ కాంగ్రెస్ పార్టీ అభ్యర్థిని బరిలోకి దించడానికి ఉత్సాహంగా ఉంది. ఇక కమ్యూనిస్టు పార్టీలు ఇంకా స్పష్టతను ఇవ్వడం లేదు. తెలుగుదేశం తో వైరి భావాన్ని, ప్రతిపక్ష వైకాపాతో కొంత దూరాన్ని పాటిస్తున్నాయి కమ్యూనిస్టు పార్టీలు. జనసేన అధినేత పవన్ తో మాత్రం సఖ్యతతో మెలుగుతున్నట్టున్నాయి కమ్యూనిస్టు పార్టీలు.

జనసేన, కమ్యూనిస్టు పార్టీలు, లోక్ సత్తాలతో కలిసి మహా కూటమిని ఏర్పాటు చేస్తామని ఇటీవలే కమ్యూనిస్టు పార్టీ నేత ఒకరన్నారు. కలిసొస్తే మరిన్ని పార్టీలను కలుపుకుంటామని కాంగ్రెస్ కు కూడా ఆఫర్ ఇచ్చాడాయన. నంద్యాల ఉప ఎన్నికల్లో కమ్యూనిస్టు పార్టీలు ఇటువంటి ప్రతిపాదనను తెచ్చే అవకాశాలు కనిపిస్తున్నాయి. మరి దానికి జనసేన ఏ మేరకు సమ్మతిస్తుంది? అనేది సందేహమే.

ఇంత వరకూ జనసేన ప్రత్యక్ష ఎన్నికల్లో పోటీ చేయలేదు. సార్వత్రిక ఎన్నికల్లో బీజేపీ, టీడీపీల తరపున పవన్ ప్రచారం చేశారు. వివిధ పరిణామాల నేపథ్యంలో పవన్ కల్యాణ్ నంద్యాల ఉప ఎన్నికల విషయంలో ఎలా స్పందిస్తాడనేది ఆసక్తికరమైన అంశం. కమ్యూనిస్టు పార్టీలు, జనసేనల తరపున ఉమ్మడి అభ్యర్థిని నిలిపి.. విజయం కోసం పవన్ కల్యాణ్ ప్రచారం చేస్తే నంద్యాల ఉప ఎన్నికల వేడి మరింత పెరుగుతుంది. అయితే.. అది జరుగుతుందా అనేది అనుమానమే.

మరో ప్రచారం ప్రకారం.. నంద్యాల ఉప ఎన్నికల్లో పవన్ టీడీపీకే మద్దతును ఇచ్చే అవకాశాలున్నాయి. భూమా నాగిరెడ్డి మరణంతో అనివార్యం అయిన ఉప ఎన్నికలు కాబట్టి.. సానుభూతితో తెలుగుదేశం తరపున పోటీ చేస్తున్న భూమా బ్రహ్మానంద రెడ్డికే పవన్ మద్దతును ఇస్తాడనే ప్రచారం సాగుతోంది.