‘ఇన్నోవేషన్ సెల్’ చీఫ్‌గా ‘రెడ్‌బస్’ ఫణీంద్ర

‘రెడ్‌బస్’ సహ వ్యవస్థాపకుడు, ప్రముఖ ఎంటర్‌ప్రెన్యూరర్ సామ ఫణీంద్ర.. తెలంగాణ చీఫ్ ఇన్నోవేషన్ ఆఫీసర్‌గా నియమితులయ్యారు. తెలంగాణ సచివాలయంలో ఐటీ శాఖ మంత్రి కేటీఆర్.. శుక్రవారం (నవంబర్ 10) ఆయనకు అపాయింట్‌మెంట్ లెటర్ అందజేశారు. స్టార్టప్ వ్యవస్థను మరింత పకడ్బందీగా చేపట్టేవిధంగా ఇన్నోవేషన్ సెల్‌ను తీర్చిదిద్దనున్నారు. హైదరాబాద్ మాత్రమే కాకుండా రాష్ట్రవ్యాప్తంగా స్టార్టప్‌లను ప్రోత్సహించడానికి, వాటికి అనువైన వాతావారణాన్ని కల్పించడానికి ఇన్నోవేషన్ సెల్ ప్రణాళికలు రచిస్తుంది. ఇందు కోసం ఫణీంద్ర సేవలను వినియోగించుకోవాలని ప్రభుత్వం భావిస్తోంది.

రాష్ట్రంలోని వివిధ విద్యా సంస్థలతోనూ కలిసి పనిచేయడానికి ఇన్నోవేషన్ సెల్ కార్యక్రమాలు రూపొందిస్తోంది. ఔత్సాహిక పారిశ్రామికవేత్తల సెల్స్‌ను ఏర్పాటు చేయడంలోనూ ఇది కీలక పాత్ర పోషించనుంది.