రాష్ట్రపతి ఎన్నికలు: బాబూ భుజాలపై పెద్ద బాధ్యత!

ప‌్ర‌ధాన‌ మంత్రి న‌రేంద్ర మోదీ.. ఏపీ సీఎం చంద్ర‌బాబు నాయుడుకు పెద్ద బాధ్య‌త‌లే అప్ప‌గించారు. ఎన్డీఏ రాష్ట్రపతి అభ్యర్థి రామ్‌నాథ్ కోవింద్‌కు మద్దతివ్వడానికి పశ్చిమ బెంగాల్ ముఖ్యమంత్రి మమతను ఒప్పించే బాధ్యతను బాబూ భుజాలపైనే పెట్టారు. రాష్ట్ర‌ప‌తి అభ్య‌ర్థిగా రామ్‌నాథ్ కోవింద్‌ను ఎంపిక చేసిన‌ట్లు చెప్ప‌డానికి చంద్రబాబుకు మోదీ ఫోన్ చేశారు. ఈ సందర్భంగా త‌మ మ‌ద్ద‌తు ఉంటుంద‌ని తెలిపిన బాబుతో.. తృణ‌మూల్ కాంగ్రెస్ అధ్య‌క్షురాలు మ‌మ‌తా బెన‌ర్జీకి ఈ విష‌యాన్ని మీరే చెప్పి ఒప్పించాలని మోదీ కోరిన‌ట్లు సమాచారం. మ‌మ‌త‌తో బీజేపీకి అంత మంచి సంబంధాలు లేని విషయం తెలిసిందే. ఈ నేపథ్యంలో ఈ బాధ్యతలను చంద్రబాబుకు అప్పగించారు.

మమతను ఒప్పించడం బాబూకు అంత సులువైన ప‌నిలా ఏమీ క‌నిపించ‌డం లేదు. ప్రస్తుతం విదేశీ ప‌ర్య‌ట‌న‌లో ఉన్న మమత ఎన్డీయే తరఫున రాష్ట్రపతి అభ్యర్థిగా రామ్‌నాథ్‌ కోవింద్‌ పేరు ప్రకటించడంపై అసంతృప్తి తెలిపారు. దేశంలో ఎంద‌రో ద‌ళిత నేత‌లుండగా.. ఆరెస్సెస్ మూలాలున్న, బీజేపీ ద‌ళిత మోర్చాకు అధ్య‌క్షుడిగా ప‌నిచేసిన వ్యక్తిని ఎంపిక చేశార‌ని మ‌మ‌త విమ‌ర్శించారు. సుష్మాస్వరాజ్‌ పేరునో, అద్వానీ పేరునో సూచించాల్సిందని అభిప్రాయపడ్డారు. ప్రస్తుత రాష్ట్రపతి ప్రణబ్‌ను రెండోసారి కొనసాగించినా బావుండేదని ఆమె పేర్కొన్నారు.

మరోవైపు ఎన్డీయే త‌మ అభ్య‌ర్థిని ప్ర‌క‌టించ‌గానే తృణ‌మూల్ కాంగ్రెస్ నేత, ఎంపీ డెరెక్ ఓబ్రైన్ ఓ వెట‌కారంతో కూడిన ట్వీట్ చేశారు. ‘ఇవాళ వికీపీడియాను ఎంత‌ మంది వెదికారు.. నేనైతో చూశాను’ అని ఆయన కామెంట్ చేశారు. దేశంలో ఎవరికీ తెలియని వ్యక్తిని రాష్ట్రపతి అభ్యర్థిగా ప్రకటించారంటూ ఆయన పరోక్షంగా బీజేపీకి పంచ్ ఇచ్చారు. ఈ నేప‌థ్యంలో బాబు మ‌ధ్య‌వ‌ర్తిత్వం ఎంత‌ వ‌ర‌కు ప‌నిచేస్తుందో చూడాలి మరి.