కేంద్ర మంత్రి గడ్కరీకి సీఎం చంద్రబాబు లేఖ!

ఆంధ్రప్రదేశ్ రాష్ట్రానికి జీవనాడి అయిన పోలవరం ప్రాజెక్టు నిర్మాణానికి పెండింగ్‌లో ఉన్న రూ.431 కోట్ల నిధులను తక్షణమే విడుదల చేయాలని ముఖ్యమంత్రి చంద్రబాబునాయుడు కేంద్రాన్ని కోరారు. ఈ మేరకు కేంద్ర జలవనరుల శాఖ మంత్రి నితిన్‌ గడ్కరీకి సోమవారం (జూన్ 25) లేఖ రాశారు. దీంతోపాటు ప్రాజెక్ట్ నిర్మాణానికి అదనంగా పెరిగిన వ్యయం రూ.1,501 కోట్లను కూడా విడుదల చేయాలని చంద్రబాబు కోరారు. ఈ ఏడాది మే నెలాఖరు నాటికి పోలవరం కోసం రూ.13,798.54 కోట్లు రాష్ట్ర ప్రభుత్వం ఖర్చు చేసిందని సీఎం తన లేఖలో వివరించారు.

పోలవరాన్ని జాతీయ ప్రాజెక్టుగా ప్రకటించాక 8,662.67 కోట్లు ఖర్చు చేస్తే కేంద్రం మాత్రం రూ.6,727.26 కోట్లు మాత్రమే అందించిందని ఈ సందర్భంగా ముఖ్యమంత్రి గుర్తుచేశారు. ఇప్పటికీ 1935.41 కోట్లు రావాల్సి ఉందని తెలిపారు. రాష్ట్ర ప్రభుత్వం ఖర్చుచేసిన నిధులతో పాటు.. పోలవరం నిర్మాణం, భూసేకరణ పరిహారం కోసం రూ.10వేల కోట్లు వెంటనే విడుదల చేయాలని సీఎం విజ్ఞప్తి చేశారు.