షాదీ ‘షేక్’: వయసు 60పైనే.. కానీ 16ఏళ్ల బాలికలు కావాలి!

బాగా బలిసిన అరబ్ షేక్‌లు.. అందమైన ఆడపిల్లల కోసం ఎంత డబ్బైనా వెదజల్లే శృంగార రాయుళ్లు.. కానీ చేతికర్ర లేనిదే నడవలేరు. అంత వృద్ధాప్యంలో ఉంటారు. కానీ వీళ్లకి పెళ్లి కోసం 16 ఏళ్ల బాలికలు కావాలి. అరబ్ దేశాల నుంచి విమానంలో దిగుతాడు. ఇక్కడ కొంత మంది బ్రోకర్లతో కలసి 10 నుంచి 20 వరకు బాలికలను ఇంటర్వ్యూలు చేస్తాడు. వారిలో తనకు నచ్చిన బాలికను ఎంచుకుంటాడు. ఆమెను పెళ్లి చేసుకునేందుకు ఎంత డబ్బైనా ఇవ్వడానికి సిద్ధపడతాడు. అతనికి తోడుగా ఇక్కడి బ్రోకర్లు. భోగభాగ్యాలతో సుఖంగా బతకొచ్చంటూ బాలికను, ఆమె కుటంబ సభ్యులను ప్రలోబపెట్టి ఆ అరబ్ షేక్‌కి ఇచ్చి పెళ్లిచేసి పంపేస్తారు.

ఇంతకీ ఈ దగాకోరు పెళ్లిని సాక్షాత్తు ఖాజీ దగ్గరుండి మరీ జరిపిస్తాడు. రాయబార కార్యాలయాన్ని సంప్రదించి, కేవలం కొన్ని రోజుల వ్యవధిలో వీసా తదితర పత్రాలన్నీ సిద్ధం చేసుకుని ముక్కుపచ్చలారని బాలికలను అరబ్ దేశాలకు ఎగరేసుకుపోతున్నారు షేక్‌లు. అక్కడకు తీసుకెళ్లి బాలికలను చిత్రహింసలు పెడుతున్నారు. ఇదంతా హైదరాబాద్‌లోని పాతబస్తీ సాక్షిగా నిరంతరం జరిగే ప్రక్రియ. మొత్తానికి పెళ్లి పేరుతో దుర్మార్గానికి పాల్పడుతున్న షేక్‌లు, బ్రోకర్లు, ఖాజీల గుట్టురట్టయింది. పేద ముస్లిం కుటుంబాల దుస్థితిని ఆసరాగా తీసుకుని యువతుల అక్రమ రవాణాకు పాల్పడుతున్న ట్రాఫికింగ్‌ రాకెట్‌ను హైదరాబాద్‌ సిటీ పోలీసులు బట్టబయలు చేశారు.

పాతబస్తీలోని పలు లాడ్జీలపై దాడులు జరిపి 15 ఏళ్ల బాలికను పెళ్లిచేసుకున్న ఒమన్‌కు చెందిన అలీ మయాహీ హబీబ్‌ అలీ ఇస్సా అనే వృద్ధషేక్‌ను, అతడి ఇద్దరు స్నేహితులను అరెస్టు చేశారు. ముగ్గురు ఖాజీలు, నలుగురు లాడ్జీ యజమానులు, ఐదుగురు బ్రోకర్లు సహా 20 మందిని అరెస్టు చేసి రిమాండ్‌కు తరలించారు. బ్రోకర్లలో మహిళలే అధికంగా ఉండడం పోలీసులను షాక్‌కు గురిచేసింది. కాగా, ఒమన్‌కు చెందిన షేక్ తమ కుమార్తెను పెళ్లిచేసుకుని ఆ దేశానికి తీసుకెళ్లాడని, అక్కడ ఆమెను చిత్రహింసలు పెడుతున్నాడని బాధితురాలి తల్లిదండ్రులు ఇటీవల పోలీసులను ఆశ్రయించారు. దీంతో రంగంలోకి దిగిన పోలీసులు పెళ్లికి బ్రోకర్లను అరెస్టు చేశారు. ఈ నేపథ్యంలోని మొత్తం షాదీ షేక్‌ల గుట్టును బట్టబయలు చేశారు.