గుత్తి: ప్రయాణికుణ్ని చితక్కొట్టిన రైల్వే పోలీస్

అనంతపురంలోని గుత్తి రైల్వే స్టేషన్‌లో ఓ ప్రయాణికుడిపై రైల్వే పోలీసులు విచక్షణారహితంగా దాడి చేశారు. బెంగళూరు-కాచిగూడ ఎక్స్‌ప్రెస్‌ గుత్తి రైల్వే స్టేషన్ చేరుకున్న సమయంలో.. సురేష్‌ అనే ఓ ప్రయాణికుడు స్లీపర్ క్లాస్‌లో ఎక్కబోయాడు. ఇది గమనించిన రైల్వే పోలీసులు అతణ్ని వారించారు. ఈ క్రమంలో వారి మధ్య ఘర్షణ చోటు చేసుకుంది. సురేష్ ఆ పోలీసులను ఎదిరించి మాట్లాడటం వారికి ఆగ్రహం తెప్పించింది. దీంతో ఓ కానిస్టేబుల్ అతణ్ని లాఠీతో చితకబాదాడు.

సురేష్‌పై పోలీస్ దాడి చేయడం పట్ల తోటి ప్రయాణికులు ఆగ్రహానికి గురయ్యారు. దాడి చేస్తున్న దృశ్యాలను కొంత మంది ప్రయాణికులు తమ సెల్‌ఫోన్లలో చిత్రీకరించారు. ఆ వీడియో కాస్త సోషల్ మీడియాలో పెట్టడంతో వైరల్‌గా మారింది.

ఈ ఘటనపై సురేష్‌ మాట్లాడుతూ.. తాను ఎలాంటి తప్పు చేయలేదని, అకారణంగా తనను రైల్వే పోలీసులు చితకబాదారని ఆవేదన వ్యక్తం చేశాడు. జనరల్‌ క్లాస్ టిక్కెట్‌తో సురేష్ స్లీపర్‌ కోచ్‌ ఎక్కబోయాడని, నచ్చజెప్పడానికి ప్రయత్నిస్తే ఎదురుతిరిగాడని పోలీసులు చెబుతున్నారు.