వరకట్న వేధింపులతో కానిస్టేబుల్‌ భార్య ఆత్మహత్య!

వరకట్న వేధింపులకు మరో మహిళ బలైంది. పెళ్లయి నాలుగు నెలలు గడవక ముందే అదనపు కట్నం కోసం భర్త వేధింపులు తట్టుకోలేకపోయిన భార్య ఉరేసుకుని బలవన్మరణానికి పాల్పడింది. ఈ ఘటన విజయవాడలోని లబ్బీపేట పోలీస్ క్వార్టర్స్‌లో సంచలనం కలిగించింది. ఈ ఘటనలో ట్విస్ట్ ఏంటంటే.. భర్త పోలీస్ కానిస్టేబుల్ కావడం. ప్రజలు తప్పు చేస్తే దండించాల్సిన పోలీసే అదనపు కట్నం కోసం భార్యను వేధించి ఆత్మహత్య చేసుకునేలా చేయడం విస్మయం కలిగిస్తోంది.

స్థానికుల కథనం మేరకు.. కృష్ణా జిల్లా బంటుమిల్లికి చెందిన కొల్లు నాగేశ్వరరావు కుమారుడైన రవికుమార్‌కు గుంటూరు జిల్లా చెరుకుపల్లి మండలం కూరేటివారిపాలెంకు చెందిన కూరేటి సీతారామయ్య కుమార్తు శిరీష(23)తో జూన్‌లో వివాహమైంది. 2012 బ్యాచ్‌కు చెందిన రవికుమార్ విజయవాడలోని సెంట్రల్ సెక్యూరిటీ వింగ్‌లో కానిస్టేబుల్‌గా పనిచేస్తున్నాడు. వివాహమైనప్పటి నుంచి భర్త అదనపు కట్నం కోసం వేధించడంతో పాటు చిన్న చిన్న అవసరాలు కూడా తీర్చకపోవడంతో శిరీష తీవ్ర మనస్తానికి గురవుతోంది. శుక్రవారం రాత్రి విధులు ముగించుకుని వచ్చిన రవికుమార్ భార్యతో కలిసి నిద్రించాడు. ఉదయం కాలింగ్ బెల్ మోగడంతో నిద్ర లేవగా శిరీష పక్కన లేదు. హాల్లోకి వెళ్లి చూడగా చున్నీతో ఫ్యాన్‌కు ఉరేసుకుని కనిపించింది. ముందు ఫ్లాట్‌లో ఉంటున్న వారి సాయంతో భార్యను కిందికి దించి చూడగా అప్పటికే ప్రాణాలు కోల్పోవడంతో పోలీసులకు సమాచారం ఇచ్చాడు. దీంతో వెస్ట్ ఏసీపీ సుధాకర్, సీఐ చంద్రశేఖర్ వివరాలు సేకరించి మృతదేహాన్ని ఆస్పత్రికి తరలించారు.

భర్తే శిరీషను చంపి ఆత్మహత్యగా చిత్రీకరిస్తున్నాడని మృతురాలి తల్లిదండ్రులు, బంధువులు ఆరోపిస్తున్నారు. వివాహ సమయంలో రూ.2లక్షల కట్నం, రెండెకరాల పొలం ఇస్తామని ఒప్పందం కుదుర్చుకున్నామని, పెళ్లి రోజున పొలం రిజిస్టర్ చేసి ఇస్తేనే తాళి కడతానని పట్టుబట్టాడని చెబుతున్నారు. తమ కుమార్తె చావుకు కారణమైన రవికుమార్‌ను కఠినంగా శిక్షించాలని వారు కోరుతున్నారు.