అమ్మనాన్నతో వెళ్లను.. పూర్ణిమ సాయి మొండిపట్టు!

హైదరాబాద్‌లో అదృశ్యమై ముంబైలో ప్రత్యక్షమైన పదో తరగతి విద్యార్థిని పూర్ణిమ సాయి తన తల్లిదండ్రులతో వెళ్లడానికి నిరాకరిస్తోంది. దీంతో కుమార్తె కోసం ఎంతో ఆశగా ఈరోజు ఉదయం ముంబై వెళ్లిన తల్లిదండ్రులకు వేదన తప్పడంలేదు. ప్రస్తుతం ఓ స్వచ్ఛంద సంస్థ సంరక్షణలో ఉన్న పూర్ణిమకు ముంబైలోని డోంగరీ బాలసుధర్ సంరక్షణ కేంద్రంలో కౌన్సెలింగ్ ఇస్తున్నారు. ముంబై డీసీపీ అంబిక స్వయంగా పూర్ణమను సముదాయిస్తున్నారు. అయినప్పటికీ అమ్మనాన్నల దగ్గరికి వెళ్లనని పూర్ణిమ మొండికేస్తున్నట్లు సమాచారం.

మరోవైపు సోమవారం ఉదయం ముంబై చేరుకున్న పూర్ణిమ తల్లిదండ్రులు, బాచుపల్లి పోలీసులు బోయవాడ పోలీస్ స్టేషన్‌లోనే వేచి చూస్తున్నారు. బాలసుధర్ గృహం.. జువైనల్ హౌజ్ కావడంతో దాని లోపలికి బయటివారిని ఎవరినీ అనుమతించరు. కాకపోతే దీన్ని ఓ స్వచ్ఛంద సంస్థ నడిపిస్తుండటంతో పూర్ణిమ సాయికి అక్కడ సంరక్షణ కల్పిస్తున్నారు. సినిమాలంటే పిచ్చి, సీరియళ్లలో నటించాలనే కోరికతోనే తాను ముంబై వచ్చినట్లు పూర్ణిమ పోలీసులకు వెల్లడించింది. హైదరాబాద్ నుంచి తొలుత షిర్డీ వెళ్లి.. అక్కడ సాయిబాబా దర్శనం చేసుకుని ముంబై వచ్చినట్లు తెలిపింది. అయితే సీరియల్స్‌లో నటించాలనే పూర్ణిమ కోరికపై తల్లిదండ్రులు అసహనం వ్యక్తం చేస్తున్నట్లు సమాచారం.

నిజాంపేటలోని అమృతసాయి రెసిడెన్సీలో నివసించే నాగరాజు, విజయకుమారి దంపతుల పెద్దకుమార్తె పూర్ణిమ సాయి. గత నెల 7వ తేదీన స్కూలుకి వెళ్తున్నానంటూ ఇంట్లో నుంచి బయటికి వెళ్లిన పూర్ణిమ సాయి తిరిగి రాలేదు. దీంతో తల్లిదండ్రులు కూకట్‌పల్లి పోలీసులను ఆశ్రయించారు. తొలుత మిస్సింగ్ కేసుగా నమోదు చేసుకున్న పోలీసులు 15 బృందాలతో తెలుగు రాష్ట్రాలతో పాటు షిర్డీ, పుణె తదితర నగరాల్లో గాలించారు. ఆచూకీ తెలియకపోవడంతో ఈనెల 13న కిడ్నాప్ కేసుగా మార్చారు. చివరికి ఆదివారం ముంబైలో దర్శనమీయడంతో అక్కడి బోయవాడ పోలీసులు సైబరాబాద్ పోలీసులకు సమాచారం అందించారు.