తెలంగాణ సీఎస్‌గా ప్రదీప్ చంద్ర

తెలంగాణ ప్రభుత్వ సీఎస్‌గా కత్తి ప్రదీప్ చంద్ర నియమితులయ్యారు. ప్రస్తుతం సీఎస్‌గా ఉన్న రాజీవ్ శర్మ పదవీ కాలం నేటితో ముగుస్తుండడంతో కేసీఆర్ ప్రదీప్ చంద్రను ఎంపిక చేశారు. కాసేపట్లో ఆయన పదవీ బాధ్యతలు స్వీకరిస్తారు. రాజీవ్ శర్మ, ప్రదీప్ చంద్ర ఇద్దరూ ఒకే బ్యాచ్ కు చెందిన ఐఏఎస్ అధికారులు. 1982 బ్యాచ్ కు చెందిన వారు. ప్రదీప్ చంద్ర ప్రస్తుతం రెవెన్యూ శాఖ ముఖ్య కార్యదర్శిగా పనిచేస్తున్నారు. గతంలో విశాఖ, గుంటూరు జిల్లాలకు కలెక్టర్ గా కూడా పనిచేశారు. ఈయనకు ఇంకా నెల రోజులే సర్వీసు ఉంది. అయినా సీనియారిటీ ప్రకారం ప్రదీప్ చంద్రనే ఎంపిక చేశారు కేసీఆర్.

ఈయన 1956, డిసెంబర్ 15న జన్మించారు. మద్రాస్ ఐఐటీలో బీటెక్, కోల్ కతా ఐఐఎంలో పీజీ పూర్తి చేశారు. అనంతరం సివిల్స్ పరీక్షలు రాసి ఐఏఎస్ అయ్యారు.