కేసీఆర్‌ అందుబాటులోకి రావట్లేదు: రాష్ట్రపతి అభ్యర్థి

విపక్షాల రాష్ట్రపతి అభ్యర్థి మీరా కుమార్‌ తన ప్రచారంలో భాగంగా సోమవారం (జులై 3) హైదరాబాద్‌కు వచ్చారు. గాంధీభవన్‌లో కాంగ్రెస్‌ పార్టీ ఎంపీలు, ఎమ్మెల్యేలతో భేటీ అయ్యారు. ఈ సందర్భంగా ఆమె మాట్లాడుతూ.. సిద్ధాంతాల కోసమే రాష్ట్రపతి ఎన్నికల్లో బరిలోకి దిగినట్లు తెలిపారు. టీఆర్‌ఎస్‌ పార్టీ మద్దతు కోసం ఆ పార్టీ అధ్యక్షుడు కేసీఆర్‌తో మాట్లాడటానికి ప్రయత్నించామని, అయితే ఆయన అందుబాటులోకి రాలేదని మీరా కుమార్ తెలిపారు. తాను స్పీకర్‌గా ఉన్న సమయంలోనే తెలంగాణ రాష్ట్రం ఏర్పడిన విషయాన్ని ఆమె గుర్తు చేశారు. ప్రజల ఆకాంక్షలను నెరవేర్చడానికే యూపీఏ ప్రభుత్వం తెలంగాణ ఇచ్చిందని ఆమె పేర్కొన్నారు.

తనకు మద్దతు ప్రకటించిన 17 రాజకీయ పార్టీలకు మీరా కుమార్‌ కృతజ్ఞతలు తెలిపారు. ఎంఐఎం పార్టీని కూడా మద్దతు కోరతామని ఆమె పేర్కొన్నారు. సోమవారం ఉదయం హైదరాబాద్‌ చేరుకున్న మీరా కుమార్‌కు కాంగ్రెస్‌ నేతలు ఘన స్వాగతం పలికారు.