కేటుగాడికి సినీ ప్రముఖులతో సన్నిహిత సంబంధాలు

రద్దయిన పాత నోట్లని మార్చే క్రమంలో టాస్క్ ఫోర్స్ పోలీసులకి పట్టుబడిన ప్రొడక్షన్ మేనేజర్ శ్రీనివాస రావు సినీనటి జీవితకు సోదరుడు కాడని టాస్క్‌ఫోర్స్‌ డీసీపీ లింబారెడ్డి స్పష్టంచేశారు. కాకపోతే సినీ పరిశ్రమలో చాలామంది ప్రముఖులతో శ్రీనివాస రావుకి సన్నిహిత సంబంధాలు ఉన్నట్లు డీసీపీ తెలిపారు. శుక్రవారం ఏర్పాటు చేసిన ప్రెస్ మీట్ లో డీసీపీ లింబారెడ్డి ఈ కేసు వివరాలని మీడియాకు వెల్లడించారు.

నిన్న జూబ్లీహిల్స్ లో శ్రీనివాస రావు సహా మరో వ్యక్తిని అరెస్ట్‌ చేసిన టాస్క్‌ఫోర్స్ పోలీసులు వారి నుంచి రూ.7 కోట్ల విలువైన పాత నోట్లను సీజ్‌ చేసిన సంగతి తెలిసిందే. బ్యాంకర్లు తమకు బాగా తెలుసునని చెబుతూ రద్దయిన పాత నోట్లు కలిగిన ధనికులని నమ్మించి వారి వద్ద సేకరించిన మొత్తాన్ని కొత్త కరెన్సీతో మార్చుకునేందుకు ఈ ముఠా ప్రయత్నాలు చేస్తున్నట్టు తమ విచారణలో తేలిందన్నారు డీసీపీ. ఈ క్రమంలోనే చెన్నైకి చెందిన కోటేశ్వర్‌ అనే వ్యక్తికి చెందిన రూ.7 కోట్ల విలువైన పాత కరెన్సీని 20% కమిషన్‌ తీసుకుని మార్పిడి చేసి ఇప్పిస్తామని వారం రోజుల క్రితమే ఆ నగదుని తీసుకుని హైదరాబాద్ వచ్చినట్టు డీసీపీ తెలిపారు.