సీపీ మహేశ్‌ భగవత్‌‌కు మరో అరుదైన గుర్తింపు

రాచకొండ కమిషనర్‌ మహేశ్‌ భగవత్‌ మరో అరుదైన గుర్తింపు పొందారు. లైంగిక అక్రమ రవాణాను నిరోధించడంలో కీలకంగా వ్యవహరిస్తున్నందుకు గాను కెనడాకు చెందిన అసెంట్‌ సాఫ్ట్‌వేర్‌ అండ్‌ డేటా సంస్థ ‘2017 టాప్‌ 100 హ్యూమన్‌ ట్రాఫికింగ్‌ అండ్‌ స్లేవరీ ఇన్‌ఫ్లుయెన్స్‌ లీడర్స్‌’ జాబితాలో మహేశ్‌కు చోటు కల్పించింది. లైంగిక అక్రమ రవాణా, ఆధునిక బానిసత్వం నిరోధానికి ప్రపంచవ్యాప్తంగా కృషి చేస్తున్న 100 మందితో కూడిన జాబితాను ఈ సంస్థ వెల్లడించింది. జాబితాలో మహేశ్‌ భగవత్‌కు 47వ స్థానం దక్కింది.

తెలంగాణ రాష్ట్ర కేడర్‌కు చెందిన ఈ ఐపీఎస్‌ అధికారి గత 13 ఏళ్లుగా లైంగిక అక్రమ రవాణా నిరోధానికి కృషి చేస్తున్నారు. ఈ మేరకు నివేదికలో ఆయణ్ని కొనియాడారు. మహేశ్‌ భగవత్‌ ఇప్పటికే యూఎస్‌ డిపార్ట్‌మెంట్‌ ఆఫ్‌ స్టేట్స్‌ ‘2017 ట్రాఫికింగ్‌ ఇన్‌ పర్సన్‌ రిపోర్ట్‌ హీరో’ పురస్కారాన్ని దక్కించుకున్న విషయం తెలిసిందే.

మహేశ్ భగవత్ రాచకొండ కమిషనరేట్‌ పరిధిలో 25 వ్యభిచార గృహాలు (5 హోటళ్లు, 20 రెసిడెన్షియల్‌ అపార్ట్‌మెంట్లు)ను సీజ్‌ చేయడంతో పాటు దేశంలోని వివిధ రాష్ట్రాలకు చెందిన 350 మంది చిన్నారుల్ని ఇటుకబట్టీల చెర నుంచి విడిపించారు. తాజాగా అసెంట్‌ సంస్థ జాబితాలో మహేశ్ భగవత్ చోటు దక్కించుకోవడంతో పలువురు అధికారులు ఆయనకు అభినందనలు తెలుపుతున్నారు.