అసెంబ్లీ డిజైన్లపై బాబుతో రాజమౌళి భేటీ

ఆంధ్రప్రదేశ్ రాజధాని అమరావతిలో నిర్మించే శాసనసభ భవనానికి సంబంధించిన తుది ఆకృతి ఇంచుమించుగా ఖరారైనట్లే. తుది తుది ఆకృతిని ఈనెల 13న ముఖ్యమంత్రి చంద్రబాబు నాయుడు అధికారికంగా ఖరారు చేసే అవకాశం ఉంది. లండన్‌కు చెందిన నార్మన్‌ ఫోస్టర్‌ అండ్‌ పార్ట్‌నర్స్‌ సంస్థ సిద్ధం చేసిన ఆకృతులపై సీఎం ఆదివారం హైదరాబాద్‌లోని తన నివాసంలో సమీక్షించారు. పురపాలక శాఖ మంత్రి పి.నారాయణ, సీఆర్‌డీఏ ముఖ్య కార్యదర్శి అజయ్‌జైన్‌, కమిషనర్‌ చెరుకూరి శ్రీధర్‌, సినీ దర్శకుడు ఎస్‌.ఎస్‌.రాజమౌళి ఈ సమావేశంలో పాల్గొన్నారు. నార్మన్‌ ఫోస్టర్‌ సంస్థ రూపొందించిన ఆకృతుల విశేషాలను రాజమౌళి సమావేశంలో ముఖ్యమంత్రికి వివరించారు.

వాస్తవానికి అసెంబ్లీ కోసం ఈ ఏడాది అక్టోబర్ 25న నార్మన్ ఫోస్టర్ రెండు డిజైన్లను ప్రభుత్వానికి సమర్పించింది. అయితే వాటిని మరింత మెరుగుపరిచి తీసురావాలని చంద్రబాబు సూచించారు. ఆ ప్రకారం సవరించిన డిజైన్లతో నార్మన్‌ ఫోస్టర్‌ సంస్థ ప్రతినిధులు మంగళవారం అమరావతికి వస్తున్నారు. 12, 13 తేదీల్లో ముఖ్యమంత్రితో సమావేశమవుతారు. ఆ సందర్భంగా శాసనసభ భవనం తుది ఆకృతిని ఖరారుచేసే అవకాశం ఉంది. అక్టోబరు చివరి వారంలో ముఖ్యమంత్రి లండన్‌ వెళ్లి నార్మన్‌ ఫోస్టర్‌ సంస్థ రూపొందించిన హైకోర్టు, శాసనసభ ఆకృతులను పరిశీలించారు. ఆ బృందంలో రాజమౌళి కూడా ఉన్నారు.

శాసనసభకు సంబంధించి చంద్రబాబు లండన్‌ వెళ్లినప్పుడు రెండు ఆకృతుల్ని ఎంపిక చేశారు. చతురస్రాకారంలో ఉన్న ఆకృతితో పాటు భవనంపై పొడవైన స్తంభం (టవర్‌)తో ఉన్న ఆకృతిని ఎంపిక చేశారు. ఆ రెండు ఆకృతులను మరింత మెరుగుపరిచి తీసుకురావాలని, వాటిలో ఉత్తమైనదాన్ని ఎంపిక చేద్దామని చెప్పారు. ఆకృతులు తెలుగుదనం ఉట్టిపడేలా, ఆంధ్రుల సంస్కృతికి అద్దం పట్టేలా ఉండాలని సూచించారు. నార్మన్‌ ఫోస్టర్‌ సంస్థ ప్రతినిధులతో ఎప్పటికప్పుడు చర్చిస్తూ తగిన సూచనలిచ్చే బాధ్యతను రాజమౌళికి అప్పగించారు. దీనిలో భాగంగా ఆదివారం డిజైన్లపై చంద్రబాబుతో రాజమౌళి చర్చించారు.