Election Commission: తెలంగాణలో ‘ముందస్తు’పై స్పందించిన ఈసీ

తెలంగాణలో ముందస్తు ఎన్నికలకు సంబంధించి కేవలం ఊహాగానాలే వినిపిస్తున్నాయని, తమకు ఎలాంటి సమాచారం లేదని రాష్ట్ర ఎన్నికల ప్రధానాధికారి రజత్ కుమార్ చెప్పారు. మరోవైపు ముఖ్యమంత్రి కేసీఆర్‌ ప్రభుత్వాన్ని రద్దుచేసి ముందస్తు ఎన్నికలకు వెళ్తారనే ఊహాగానాలు నిజమయ్యే అవకాశాలు కనిపిస్తున్నాయి. ఈ నేపథ్యంలో రజత్‌కుమార్‌తో అఖిలపక్ష నాయకులు సచివాలయంలో బుధవారం సమావేశం అయ్యారు. ఓటర్ల జాబితా ముసాయిదాపై మాత్రమే చర్చించినట్లు ఆయన తెలిపారు. ఒకవేళ శాసనసభను రద్దుచేస్తే.. ముందస్తు ఎన్నికలు నిర్వహించాలని కేంద్ర ఎన్నికల సంఘం నిర్ణయిస్తే అందుకు తగిన ఏర్పాట్లు చేస్తామని పేర్కొన్నారు.

‘రెగ్యులర్ షెడ్యూల్ ప్రకారం జరగాల్సిన ఎన్నికలకు సంబంధించిన ప్రక్రియను కొనసాగిస్తున్నాం. ఈ క్రమంలోనే ఓటర్ల జాబితా సవరణ ప్రక్రియపై రాజకీయపార్టీలతో సమావేశం నిర్వహించాం. రాష్ట్రానికి 84వేలకు పైగా వీవీప్యాట్, కంట్రోల్ యూనిట్లు, లక్షా 23వేల బ్యాలెట్ యూనిట్లు అవసరం. నగరంలోని ఈసీఐఎల్‌లో అవి సిద్ధం చేస్తున్నారు. ఒకవేళ టీఆర్‌ఎస్‌ ముందస్తు ఎన్నికలకు పిలుపునిస్తే ఏర్పాట్లు చేస్తాం. నామినేషన్లకు పది రోజుల ముందు వరకు ఓటర్ల నమోదుకు అవకాశం ఇస్తాం. 2019 జనవరి 1 నాటికి 18 ఏళ్లు నిండినవారు ఓటు హక్కు పొందవచ్చు అని’ రజత్ కుమార్ వివరించారు.

సమావేశం అనంతరం కాంగ్రెస్‌ సీనియర్‌నేత మర్రి శశిధర్‌రెడ్డి మాట్లాడుతూ.. కాంగ్రెస్‌ కూడా ముందస్తు ఎన్నికలకు సిద్ధమే అన్నారు. కొన్ని ప్రాంతాల్లో టీఆర్ఎస్‌కు మద్దతివ్వని ఓటర్లను తొలగించారని ఆరోపించారు. ఇటీవల విడుదల చేసిన ఓటర్ల జాబితా ముసాయిదాపై బీజేపీ అధికార ప్రతినిధి వెంకటరెడ్డి అభ‍్యంతరాలు వ్యక్తం చేశారు. మరోవైపు గురువారం నాడు అధికార టీఆర్ఎస్ ముందస్తు ఎన్నికలపై తమ నిర్ణయాన్ని వెల్లడించే అవకాశాలు కనిపిస్తున్నాయి.