ఏపీ అసెంబ్లీ నిర్మాణాలపై వర్మ వ్యంగ్య సలహా!

ప్రపంచంలోని అత్యద్భుతమైన రాజధానుల్లో ఒకటిగా అమరావతిని నిలపాలనే ధృడ‌ నిశ్చయంతో ఆంధ్రప్రదేశ్ ప్రభుత్వం ముందుకు సాగుతోంది. దీనిలో భాగంగా అమరావతిలో అసెంబ్లీ భవనాల నిర్మాణంలో ఎక్కడా రాజీపడే ప్రసక్తిలేదని ఏపీ సీఎం ప్రకటించిన విషయం తెలిసిందే. ఇప్పటికే ఈ నిర్మాణానికి సంబంధించిన డిజైన్లను నార్మన్ ఫోస్టర్ సంస్థ ప్రభుత్వానికి అందజేసింది. అయితే, దీన్ని పరిశీలించిన సీఎం చంద్రబాబు డిజైన్ మరింత గొప్పగా ఉండాలని సూచించారు. అంతేకాదు, దర్శక దిగ్గజం రాజమౌళి సలహాలు తీసుకోవాలంటూ నార్మన్ సంస్థకు, సీఆర్డీఏ అధికారులకు సీఎం ఆదేశించారు. రాజమౌళితోనూ చంద్రబాబు భేటీ అయ్యారు. రాజధాని నిర్మాణంలో కొన్ని సూచనలు, సలహాలు ఇవ్వాలని ఆయనను కోరారు.

ఈ అంశంపై దర్శకుడు రామ్ గోపాల్ వర్మ తనదైన శైలిలో ఫేస్‌బుక్‌లో స్పందించారు. కోట్లాది రూపాయలు వెచ్చించి అసెంబ్లీని నిర్మించడం దండగ అని ఆయన అన్నారు. ఏపీ ప్రభుత్వానికి ఒక గొప్ప సలహాను ఇస్తున్నానని... అసెంబ్లీ సమావేశాలను గ్రీన్ మ్యాట్ స్క్రీన్ ముందు నిర్వహించాలని... ఆ తర్వాత రాజమౌళి సహకారంతో గ్రాఫిక్స్ జతచేసి టెలికాస్ట్ చేస్తే అద్భుతంగా ఉంటుందని వ్యంగ్యంగా అన్నారు. ఇలా చేస్తే మన అసెంబ్లీ ప్రపంచంలోని అన్ని అసెంబ్లీల కన్నా గొప్పగా ఉంటుందని అన్నారు. ఎందుకంటే ఇది 'బాహుబలియన్ అసెంబ్లీ' కాబట్టి అంటూ ముగించారు. అయితే దీనిపై అభిమానులు భిన్నంగా స్పందించారు. మీరెందుకు సినిమాలు తీసి, విడుదల చేసి నిర్మాతల సొమ్ము వృథాచేస్తారు. నేరుగా ఫేస్‌బుక్, ట్విట్టర్‌లో పెట్టండి, ఐటమ్ సాంగ్ రోజాతో చేయించండంటూ సెటైర్లు వేస్తున్నారు.