కనిపించిన నెలవంక: రేపే రంజాన్ పండగ

రంజాన్ పవిత్ర మాసం పూర్తి చేసుకుని రంజాన్ పర్వదినం సమీపించిన తరుణంలో ఆదివారం సాయంత్రం నెలవంక కనిపించింది. నెలవంక కనిపించడంతో సోమవారం జూన్ 26వ తేదీన ముస్లిం సోదర, సోదరీమణులు రంజాన్ పండగ జరుపుకోవాల్సిందిగా మర్కజీ చాంద్ కమిటీ అధ్యక్షుడు మౌలానా ఖలిద్ రషీద్ ఫిరంగీ ప్రకటించారు. మజ్లిస్ ఎ ఉలేమా డెక్కన్ మర్కజి రొహియత్ హిలాల్ కమిటీ కూడా సోమవారం రంజాన్ జరుపుకోవాల్సిందిగా సూచించింది.

ఇప్పటికే హైదరాబాద్ రంజాన్ పండగ శోభతో కలకలలాడుతోంది. తెల్లవారితే ఈద్ ఉల్ ఫితుర్‌ని వేడుకలా జరుపుకునేందుకు ముస్లిం సోదరులు ఏర్పాట్లలో మునిగిపోయారు. సర్వమత సమ్మేళనానికి ప్రతీకగా నిలిచే హైదరాబాద్ ఈ వేడుక కోసం సర్వాంగ సుందరంగా ముస్తాబైంది. సౌది అరేబియాలో ఇక్కడికన్నా ఒక రోజు ముందుగానే నెలవంక కనిపించడంతో ఆదివారమే అక్కడ ఈద్ ఉల్ ఫితుర్ సెలబ్రేషన్స్ జరుపుకున్నారు.