ఘనంగా దాశరథి జయంతి ఉత్సవాలు..

‘నా తెలంగాణ కోటి రతనాల వీణ’ అని నినదించిన దాశరథి కృష్ణమాచార్య 93వ జయంతిని శనివారం (జులై 22) రవీంద్రభారతిలో ఘనంగా నిర్వహించారు. నిజాం ప్రభువు నిరంకుశ పాలనకు వ్యతిరేకంగా గళం విప్పిన దాశరథి సేవలను పలువురు వక్తలు కొనియాడారు. సామాజిక సమస్యలపై దాశరథి సాగించిన పోరాటం నిరుపమానం అని వక్తలు పేర్కొన్నారు. అభ్యుదయ భావాలతో అనేక రచనలు చేసి ప్రజలను చైతన్యం చేశారని అన్నారు. ఈ సందర్భంగా తెలుగు విశ్వవిద్యాలయ మాజీ ఉపకులపతి, రచయిత ఆచార్య ఎన్‌. గోపికి 2017 సంవత్సరానికి గాను ‘దాశరథి పురస్కారం’ ప్రదానం చేశారు. స్వరాజ్యం, స్వేచ్ఛ కోసం నిరంతరం తపించిన దాశరథి స్ఫూర్తితో కవులు, కళాకారులను గౌరవించుకోవాల్సిన అవసరం ఉందని వక్తలు పేర్కొన్నారు.

తెలంగాణ రాష్ట్ర ఆవిర్భావం నాటి నుంచి దాశరథి, కాళోజీ లాంటి మహాకవుల జయంత్యుత్సవాలను ప్రభుత్వం అధికారికంగా నిర్వహిస్తోంది. ఈ కార్యక్రమంలో తెలంగాణ సభాపతి మధుసూదనాచారి, శాసనమండలి ఛైర్మన్‌ స్వామిగౌడ్‌, డిప్యూటీ సీఎం మహమూద్‌ అలీ, పర్యాటక శాఖ మంత్రి చందూలాల్‌ తదితరులు పాల్గొన్నారు.