రేవంత్ రెడ్డిని ఇరకాటంలో పెట్టిన టీడీపీ!

రాజీనామా విషయంలో రేవంత్ రెడ్డిని ఇరకాటంలో పడేసింది తెలంగాణ టీడీపీ. పార్టీ మారిన నేపథ్యంలో తను తెలుగుదేశం పార్టీ ద్వారా వచ్చిన ఎమ్మెల్యే పదవికి రాజీనామా చేసినట్టుగా ఇది వరకే రేవంత్ రెడ్డి ప్రకటించారు. తన రాజీనామా పత్రాన్ని స్పీకర్ ఫార్మాట్ లో టీడీపీ అధినేత చంద్రబాబుకు ఇచ్చినట్టుగా రేవంత్ రెడ్డి ప్రకటించారు. తను తెలుగుదేశం పార్టీ తరఫున ఎమ్మెల్యేగా గెలిచాను కాబట్టి.. రాజీనామాను బాబుకే ఇచ్చానని, ఆయన తెలంగాణ స్పీకర్ కు పంపించాల్సి ఉందని రేవంత్ రెడ్డి అన్నారు.

అయితే.. ఆ అంశంపై చంద్రబాబు ఇంతవరకూ ఏం స్పందించలేదు కానీ, ఇప్పుడు టీటీడీపీ నేత ఎల్.రమణ ఆ అంశంపై రియాక్ట్ అయ్యాడు. రేవంత్ రాజీనామా చంద్రబాబు వద్ద లేదు.. అని ఈయన చెప్పుకురావడం గమనార్హం.

చంద్రబాబుకు రేవంత్ రెడ్డి ఎలాంటి రాజీనామా లేఖనూ ఇవ్వలేదని రమణ అన్నారు. రేవంత్ రెడ్డి టీడీపీని వీడటం వల్ల తెలంగాణలో తమ పార్టీకి వచ్చిన ఇబ్బంది ఏమీ లేదని రమణ వ్యాఖ్యానించారు. పాలమూరు జిల్లాలో తెలుగుదేశం పార్టీ బలంగానే ఉందని అన్నారు. మరి టీటీడీపీ ఇలా ప్రకటించిన నేపథ్యంలో స్పందించాల్సిన బాధ్యత రేవంత్ మీద పడింది. ఇంతకీ రేవంత్ రాజీనామా చేసినట్టా? చేయనట్టా?