రేవంత్ రెడ్డికి మంత్రి కేటీఆర్ షాక్ ఇచ్చారా ?

తెలంగాణ టీడీపీ నేత రేవంత్ రెడ్డి ఆ పార్టీని వీడి కాంగ్రెస్ పార్టీలో చేరబోతున్నారని, త్వరలోనే అధికార పార్టీకి వ్యతిరేకంగా రేవంత్ రెడ్డి పాదయాత్రకు సిద్ధమవుతున్నారని వార్తా కథనాలు వెలువడుతున్న తరుణంలోనే ఆయనకి అధికార టీఆర్ఎస్ పార్టీ నుంచి గట్టి షాక్ తగిలినట్టు తెలుస్తోంది. రేవంత్ రెడ్డి సొంత నియోజకవర్గమైన కొడంగల్‌కి చెందిన టీడీపీ కేడర్ మొత్తం ఇవాళ సాయంత్రం మంత్రి కేటీఆర్ సమక్షంలో టీఆర్ఎస్ పార్టీలో చేరనున్నారని సమాచారం. ఈమేరకు మీడియాలో పలు వార్తా కథనాలు వెలువడుతున్నాయి.

తన సొంత క్యాడర్‌ని వెంట తీసుకుని వెళ్లి కాంగ్రెస్‌లో చేరి అధికార పార్టీపై సమరం మొదలెడదామనుకున్న రేవంత్ రెడ్డికి ఒక విధంగా ఇది ఇబ్బందికరమైన పరిణామమే అంటున్నారు రాజకీయ పరిశీలకులు. ఇదిలావుంటే, మరోవైపు మోత్కుపల్లి నర్సింహులు, అరవింద్ కుమార్ గౌడ్ వంటి టీటీడీపీ అగ్రనేతలు సైతం రేవంత్ రెడ్డిపై గుర్రుగా వున్నారు. రేవంత్ రెడ్డి ఎవరి అనుమతి తీసుకుని వెళ్లి రాహుల్ గాంధీని కలిశారు అంటూ అగ్రనేతలు ఆగ్రహం వ్యక్తంచేస్తున్నారు. మీడియాలో వచ్చే కథనాలకి తాను బాధ్యుడిని ఎలా అవుతాను అని రేవంత్ రెడ్డి వాదిస్తున్నప్పటికీ.. ఆయన తర్వాతి కార్యాచరణ ఏ విధంగా వుండనుందనేదానిపైనే ప్రస్తుతం ఆసక్తి నెలకొని వుంది.