కోర్టు ఆదేశాలతో హైదరాబాద్‌కు వరవరరావు

విరసం నేత వరవరరావును పోలీసులు పుణె నుంచి హైదరాబాద్‌కు గురువారం (ఆగస్టు 30) ఉదయం తీసుకువచ్చారు. సుప్రీంకోర్టు ఆదేశాల మేరకు నేటి నుంచి సెప్టెంబర్‌ 6 వరకు గృహనిర్బంధంలో ఉంచనున్నారు. ప్రధాని హత్యకు కుట్ర రచన, మావోయిస్టులతో సంబంధాలు ఉన్నాయన్న ఆరోపణలు వరవరరావుపై ఉన్నాయి. శంషాబాద్‌ ఎయిర్‌పోర్ట్‌ నుంచి భారీ భద్రత మధ్య గాంధీనగర్‌లోని ఆయన నివాసానికి తరలించారు. వరవరరావు ఇంట్లో మంగళవారం సోదాలు నిర్వహించిన పోలీసులు ఆయన్ని అరెస్టు చేసి పుణె తీసుకువెళ్లిన విషయం తెలిసిందే.


చట్ట వ్యతిరేక కార్యకలాపాల నిరోధక చట్టం కింద వరవరరావు సహా ఐదుగురు పౌరహక్కుల నేతలను పుణె పోలీసులు అరెస్టు చేశారు. వీరి అరెస్టును వ్యతిరేకిస్తూ ప్రజాసంఘాల నేతలు బుధవారం సుప్రీంకోర్టును ఆశ్రయించారు. పౌరహక్కుల కార్యకర్తలను కారాగారంలో పెట్టొద్దని.. గృహనిర్బంధంలోనే ఉంచి.. విచారణ జరపాలని సుప్రీంకోర్టు ఆదేశాలు జారీ చేసింది. దీంతో వరవరరావును హైదరాబాద్‌ తరలించిన పోలీసులు... ప్రస్తుతం గృహ నిర్బంధంలో ఉంచారు.