రోహిత్ వేముల దళితుడు కాదు: నివేదిక

గతేడాది హత్మహత్య చేసుకున్న హైదరాబాద్ సెంట్రల్ యూనివర్సిటీ రిసెర్చ్ స్కాలర్ రోహిత్ వేముల దళితుడు కాదని గుంటూరు జిల్లా కలెక్టర్ నేతృత్వంలో నియమించిన విచారణ కమిటీ వెల్లడించింది. రోహిత్ కానీ, ఆయన తల్లి రాధిక గానీ దళితులు కాదని కలెక్టర్ ప్రభుత్వానికి సమర్పించిన నివేదికలో పేర్కొన్నారు.

తప్పుడు ధృవీకరణ పత్రాలు సమర్పించి రోహిత్ వేముల కుటుంబం ఎస్సీ కులం సర్టిఫికేట్ పొందినట్లు కమిటీ తెలిపింది. ఆ సర్టిఫికేట్లను రద్దు చేయాలని నిర్ణయించినట్లు కలెక్టర్ కమిటీ వివరించింది.

‘‘మేం రోహిత్ వేముల కులంపై సమగ్ర విచారణ జరిపాం. ఆ విచారణలో రోహిత్ ఆయన తల్లి దళితులు కాదని తేలింది’’ అని గుంటూరు జిల్లా కలెక్టర్ కాంతిలాల్ దండే తెలిపారు.
తప్పుడు ధృవీకరణ పత్రాలు సమర్పించి పొందిన ఎస్సీ సర్టిఫికేట్లను ఎందుకు రద్దు చేయకూడదో తెలియజేయాలని రోహిత్ వేముల కుటుంబ సభ్యులకు నోటీసులు పంపినట్లు కలెక్టర్ పేర్కొన్నారు.

గతేడాది జనవరి 17న హైదరాబాద్ సెంట్రల్ యూనివర్సిటీలో రోహిత్ వేముల ఆత్మహత్య చేసుకున్నాడు. యూనివర్సిటీ అధికారులు, ఇతర విద్యార్థి సంఘాలు వేధింపుల వల్లే రోహిత్ వేముల ఆత్మహత్యకు పాల్పడ్డాడని దళిత సంఘాలు దేశవ్యాప్తంగా ఉద్యమించాయి. విద్యాసంస్థల్లో దళిత విద్యార్థుల హక్కుల పరిరక్షణ కోసం రోహిత్ చట్టం రూపొందించాలని డిమాండ్ చేశారు.