ఎట్టెట్టా..! ఎలుకల నిర్మూలన కోసం అంత ఖర్చా?!

ఎలుకల నిర్మూలన కోసం మీకైతే ఎంత ఖర్చవుతుంది? పంటలను పాడు చేసే ఎలుకలను నిర్మూలించుకోవడానికి రైతులు మహా అయితే రూ. 2 నుంచి రూ. 3 వేలు ఖర్చు చేస్తారు. కానీ, కర్నూలు ప్రభుత్వ ఆసుపత్రిలో ఎలుకల నిర్మూలన చర్య బాగా ఖర్చుతో కూడుకున్న వ్యవహారంగా మారింది. 2016 జూన్ నుంచి 2017 జూన్ వరకు ఈ ఆసుపత్రిలో కేవలం 300 ఎలుకలను పట్టుకోవడానికి రూ. 60 లక్షలు ఖర్చు చేశారంటే నమ్మగలరా..? అంటే.. ఒక్కో ఎలుకకు రూ. 20 వేళ వ్యయం అయిందన్నమాట. ప్రభుత్వ సొమ్మును దుబారా చేయడానికి ఇంతకంటే పరాకాష్ట మరోటి ఏముంటుంది..? ఎలుకలు పెట్టిన కన్నాల కంటే కాంట్రాక్టర్ పెట్టిన కన్నమే పెద్దగా ఉందంటూ జనం మండిపడుతున్నారు.

కర్నూలు హాస్పిటల్‌లో ఎలుకల బెడద తీవ్రమైన విషయం తెలిసిందే. ఆసుపత్రి గోడలకు అవి పెద్ద పెద్ద కన్నాలు పెడుతున్నాయి. ముఖ్యమైన ఫైళ్లన్నింటినీ నాశనం చేస్తున్నాయి. ఎలుకలు కొరకడం వల్ల శిశువు మరణించిన ఉదంతాలు కూడా ఆంధ్రప్రదేశ్ ప్రభుత్వ ఆసుపత్రుల చరిత్రలో ఉన్నాయి. ఈ నేపథ్యంలో ఎలుకల బాధ భరించలేని అధికారులు వాటి నిర్మూలన కోసం గతేడాది చర్యలు చేపట్టారు. ఇందు కోసం ఓ ప్రైవేట్ కాంట్రాక్టర్‌కు పనులు అప్పగించారు.

సదరు ఏజెన్సీపై సరైన నియంత్రణ లేకపోవడం వల్ల ఇలా అడ్డగోలుగా వెనకేసుకున్నాడని ఆసుపత్రి సూపరింటెండెంట్ డాక్టర్ జె. వీరా స్వామి తెలిపారు. ఆరోగ్య శాఖా మంత్రి కామినేని శ్రీ‌నివాస్‌కు ఆ కాంట్రాక్టర్ సన్నిహితుడు కావడం వల్ల గట్టిగా నిలదీయలేకపోతున్నారని ఆయన వాపోయారు.