సదావర్తి వేలం.. తేడా 37 కోట్లపైనే..!

తమిళనాడులోని సదావర్తి సత్రం భూముల వ్యవహారం ఆసక్తికరమైన మలుపు తిరిగింది. చెన్నైలో సోమవారం జరిగిన బహిరంగ వేలం పాటలో.. ఈ భూముల విలువ భారీ స్థాయిలో పలికింది. వేలం పాటలో ఏకంగా 60 కోట్లా 30 లక్షల రూపాయలకు ఇవి అమ్ముడయ్యాయి. కడప జిల్లా ప్రొద్దుటూరుకు చెందిన సత్యనారాయణ రెడ్డి అనే వ్యాపారవేత్త వేలం పాటలో మొత్తానికి ఈ భూములను కొనుక్కొన్నారు. బహిరంగ వేలం, సీల్డ్ కవర్లలో కోట్ చేసిన.. మొత్తాలను పరిశీలించిన అనంతరం.. సత్యనారాయణ బిల్డర్స్ సంస్థ పాడిన 60 కోట్లా 30 లక్షల రూపాయల మొత్తం గరిష్టమని తేలడంతో.. భూములు ఆ సంస్థకే దక్కినట్టైంది.

వేలంలో ఈ భూములను కొనడానికి పలువురు పోటీలు పడ్డారు. కోర్టు నిర్ధారించిన 27 కోట్ల రూపాయల కనిష్ట మొత్తంతో మొదలైన వేలం పాట.. క్రమక్రమంగా పెరుగుతూ పోయింది. అంతిమంగా అరవై కోట్ల రూపాయలా ముప్పై లక్షల రూపాయలకు ఈ భూములను సత్యనారాయణ బిల్డర్స్ సొంతం చేసుకుంది. సీల్డ్ కవర్లలో మొత్తాలను పరిశీలించి చూడగా.. ఆ కొటేషన్లు అన్నీ బహిరంగ వేలంలో పలికిన ధర కన్నా తక్కువే కావడంతో.. భూములు సత్యనారాయణ బిల్డర్స్ కే దక్కాయి.

ఆసక్తికరమైన విషయం ఏమిటంటే.. ప్రభుత్వం తొలిసారిగా సదావర్తి భూములను అమ్మిన మొత్తంతో పోల్చుకుంటే.. తాజా వేలంతో సమకూరిన మొత్తం అత్యంత భారీగా ఉంది. మొత్తం 83 ఎకరాలా 11 గుంటల భూమిని ఏపీ ప్రభుత్వం 22 కోట్ల రూపాయల మొత్తానికే అమ్మేసింది. దీనీపై వైఎస్సార్ కాంగ్రెస్ పార్టీ ఎమ్మెల్యే ఆళ్ల రామ‌కృష్ణా రెడ్డి కోర్టుకు ఎక్కారు. సుదీర్ఘ విచారణ అనంతరం.. ఐదు కోట్లు అదనంగా ఇచ్చి ఆ భూములను కొనుక్కోవచ్చని ప్రభుత్వ న్యాయవాది కోర్టులో పేర్కొన్నారు.

దానికి ఆళ్ల సమ్మతం తెలిపారు. 27 కోట్ల రూపాయల మొత్తానికి ఆ భూములు కొనుక్కోవడానికి ముందుకు వచ్చారు. అయితే తదుపరి విచారణల్లో ఈ భూములను మళ్లీ వేలం వేయాలని.. కోర్టు ఆదేశించింది. ఈ మేరకు జరిగిన వేలం పాటలో భూముల విలువ 60 కోట్ల రూపాయల పై స్థాయిలో పలికింది. మరి మొదట అమ్మిన ధరకు, ప్రస్తుత ధరకే భారీ వ్యత్యాసం ఉండటం గమనించవచ్చు. దీంతో అదనంగా దాదాపు 38 కోట్ల రూపాయల మొత్తం ప్రభుత్వ ఖజానాకు సమకూరింది.