సదావర్తి భూములు ఆయన సొంతం ఇక!

అనేక మలుపుల అనంతరం సదావర్తి సత్రం భూముల వ్యవహారం ఇప్పుడిప్పుడు ఒక కొలిక్కి వస్తోంది. ఒకవైపు ఈ భూముల వ్యవహారం గురించి సుప్రీం కోర్టులో శుక్రవారం విచారణ కొనసాగగా, ఇదే సమయంలో సత్రం భూములను కొనడానికి వేలంలో పోటీ పడ్డ వ్యక్తి కొనుగోలుకు సగం మొత్తాన్ని జమ చేసినట్టుగా తెలుస్తోంది. ఈ భూములను అరవై కోట్ల ముప్పై లక్షల రూపాయలకు సత్యనారాయణ రెడ్డి అనే వ్యక్తి మొదట వేలం పాడిన సంగతి తెలిసిందే. బహిరంగ వేలంలో ఈ మొత్తాన్ని పాడి అతడు భూములను కొనుగోలు చేశాడు. అయితే వేలం పూర్తయ్యాకా ఆయన మాట మార్చారు. తను భూములను కొనడం లేదని ప్రకటించాడు.

ఈ నేపథ్యంలో వేలంలో రెండో స్థానంలో నిలిచిన వ్యక్తికి అవకాశం దక్కింది. మొదటి వ్యక్తి కొనలేదు.. కొనే ఆసక్తి ఉందా? అని ఆయనను అడుగగా ఆయన సమ్మతం తెలిపారు. బహిరంగ వేలంలో ఈ వ్యక్తి అరవై కోట్లా 25 లక్షల రూపాయల వరకూ పాడారు. ఇప్పుడు అదే మొత్తానికి భూమిని దక్కించుకుంటున్నారు. ఆయన పేరు చదలవాడ లక్ష్మణ్.

ఇప్పటికే ఆయన వేలం పాటలో పాడిన మొత్తంలో సగం మొత్తాన్ని జమ చేసినట్టుగా తెలుస్తోంది. ఈ విషయాన్ని సదావర్తి సత్రం ఈవో కూడా ధ్రువీకరించారు. దాదాపు ముప్పై కోట్ల రూపాయల మొత్తాన్ని చదలవాడ లక్ష్మణ్ జమ చేశాడని సదావర్తి ఈవో పేర్కొన్నారు. మరి ఈ స్థాయిలో చెల్లింపు జరిగిన నేపథ్యంలో ఈ భూమి ఆయన సొంతం అవుతున్నట్టే అనుకోవాలి.

మరోవైపు సదావర్తి బహిరంగ వేలంలో భూముల విలువ భారీ పెరగడాన్ని స్వాగతించింది సుప్రీం కోర్టు. ఇంకోవైపు ఈ భూముల వ్యవహారంపై సీబీఐ దర్యాప్తు చేయించాలని కమ్యూనిస్టు పార్టీ నేత నారాయణ సుప్రీంలో ఇంప్లీడ్ పిటిషన్ దాఖలు చేశారు.