కేటీఆర్‌ పాలనకు కితాబు ఇచ్చిన సమంత

ప్రముఖ సినీ నటి, తెలంగాణ చేనేత బ్రాండ్ అంబాసిడర్ సమంత ఈరోజు సిద్ధిపేట జిల్లా దుబ్బాకలో వున్న చేనేత సహకార సంఘాన్ని సందర్శించారు. అనంతరం ఆమె అక్కడి చేనేత కార్మికులతో కాసేపు సరదాగా ముచ్చటించి వారి సమస్యలను అడిగి తెలుసుకున్నారు.

ఈ సందర్భంగా సమంత మాట్లాడుతూ.. తెలంగాణ రాష్ట్రం ఏర్పడిన తర్వాత మంత్రి కేటీఆర్ నాయకత్వంలో చేనేత వస్త్రాలకి మంచి ఆదరణ కనిపిస్తోందని అన్నారు. మనదేశంలోకన్నా విదేశాల్లోనే మన చేనేత వస్త్రాలకి ఎక్కువ డిమాండ్ ఉందని అభిప్రాయపడ్డారామె. రానున్న కాలంలో చేనేతను మరింత బలోపేతం చేసేందుకు తన వంతు కృషి చేస్తానని స్పష్టంచేశారు సమంత. సమంత దుబ్బాకకు వస్తుందన్న సమాచారంతో ఆమె అభిమానులు పెద్ద సంఖ్యలో అక్కడికి చేరుకున్నారు.