బెజవాడలో స్కూల్ బస్సు బీభత్సం.. డ్రైవర్‌కు ఫిట్స్ రావడంతో

విజయవాడలో ఓ ప్రైవేట్ స్కూల్ బస్సు బీభత్సం చేసింది. ఏలూరు రోడ్డులోని పాత బస్టాండ్‌ సమీపంలో అదుపుతప్పి ఆగి ఉన్న కారును ఢీకొంది. ఫుట్‌పాత్‌పైకి దూసుకెళ్లింది. ప్రమాదం జరిగిన సమయంలో బస్సులో 20 మంది విద్యార్థులు ఉన్నారు. విద్యార్థులకు ఎలాంటి గాయాలు కాకపోవడంతో అందరూ ఊపిరి పీల్చుకున్నారు. ప్రమాదం జరిగిన సమయంలో ఆ మార్గం వెంట వస్తున్న ఓ పాదచారుడికి స్వల్ప గాయాలయ్యాయి. కారు నుజ్జునుజ్జయ్యింది.

విజయవాడ నగరంలో శనివారం (జూన్ 29) ఉదయం చోటు చేసుకున్న ఈ ఘటనతో పెను ప్రమాదం తప్పింది. కారులో ఎవరైనా ఉన్నా.. బస్సు బోల్తా పడినా పరిస్థితి ఘోరంగా ఉండేది.

బస్సు డ్రైవర్‌కు ఫిట్స్‌ రావడం వల్లే ప్రమాదం జరిగిందని స్థానికులు తెలిపారు. అతడిని సమీపంలోని ఆస్పత్రికి తరలించి చికిత్స అందిస్తున్నారు. స్థానికులు ఇచ్చిన సమాచారంతో పోలీసులు ఘటనా స్థలికి చేరుకున్నారు. గవర్నర్‌పేట ట్రాఫిక్‌ పోలీసులు కేసు నమోదు చేసి దర్యాప్తు చేస్తున్నారు.