ఏపీ లో రెండో రాజధాని డిమాండ్..!

తిరుపతిని ఆంధ్రప్రదేశ్ కు రెండో రాజధానిగా ప్రకటించాలని డిమాండ్ చేస్తోంది వైఎస్సార్ కాంగ్రెస్ పార్టీ. అమరావతిని రాజధాని వ్యవహరిస్తున్న నేపథ్యంలో తిరుపతిని ఏపీకి రెండో రాజధానిగా చేయాలని ఆ పార్టీ ఎమ్మెల్యే జి.శ్రీకాంత్ రెడ్డి డిమాండ్ చేశారు. విభజనానంతరం రాయలసీమకు చెందిన ఒక ప్రజాప్రతినిధి నుంచి ఈ తరహా డిమాండ్ వినిపిస్తుండటం ఆసక్తికరంగా మారింది.

అత్యంత వెనుకబడిన రాయలసీమలో తిరుపతిని రెండో రాజధానిగా ఏర్పాటు చేసి ఆ ప్రాంత అభివృద్ధికి ప్రభుత్వం ప్రత్యేక శ్రద్ధ చూపాలని శ్రీకాంత్ రెడ్డి అంటున్నారు. వెలగపూడిలో వందల కోట్ల రూపాయలు వెచ్చించి.. తాత్కాలిక రాజధానిని నిర్మించారని, దాని బదులు తాత్కాలిక రాజధానిగా అయినా తిరుపతికి అవకాశం కల్పించి ఉండాల్సిందని ఈయన అన్నారు. తిరుపతి రూపంలో రాయలసీమకు రెండో రాజధాని అవకాశాన్ని ఇవ్వడంతో పాటు హై కోర్టును కూడా తిరుపతిలో ఏర్పాటు చేయాలని ఆయన డిమాండ్ చేశారు.

ఏపీకి నూతనంగా నిర్మిస్తామంటున్న రాజధాని అమరావతి రాయలసీమలోని చాలా ప్రాంతానికి సుదూరంగా ఉంటుంది. చిత్తూరు, అనంతపురం, కర్నూలు జిల్లాల్లోని కొన్ని ప్రాంతాల నుంచి విజయవాడ ప్రాంతానికి వెళ్లడానికి సరైన రహదారులు కూడా లేవు. ఆ ప్రాంతాల నుంచి రాజధానికి రావడానికి మలుపుల్లేని రహదారులను నిర్మిస్తానని ముఖ్యమంత్రి చంద్రబాబు అంటున్నారు కానీ, దూరం దూరమే. అసలు విభజన తర్వాత రాజధానిగా కర్నూలును ప్రకటించాలని కూడా ఆ ప్రాంతం నుంచి డిమాండ్లు వినిపించాయి.



అయితే ప్రభుత్వం వాటిని ఖాతరు చేయలేదు. అమరావతిని రాజధానిగా ప్రకటించింది. ఈ నేపథ్యంలో రాయలసీమలో రెండో రాజధాని నైనా ఏర్పాటు చేయాలనే డిమాండ్ వినిపిస్తోంది. అయితే ప్రభుత్వం ఈ డిమాండ్ ను పట్టించుకోకపోవచ్చు. రాజధాని అంతా అమరావతి పరిధిలోనే కేంద్రీకృతమై ఉండాలనేది ముఖ్యమంత్రి చంద్రబాబు ఆలోచన. ఈ నేపథ్యంలో వికేంద్రీకరణకు అస్సలు ఒప్పుకోకపోవచ్చు.