Telakapalli Ravi: ‘జగన్ కేంద్రిత మినిస్ట్రీ.. నెం.2 ఉండకూడదనే ఆ ఐదుగురు’

జగన్ ప్రభుత్వంలో ఐదురుగు ఉప ముఖ్యమంత్రులు ఉండటంపై ఆసక్తికరమైన వ్యాఖ్యలు చేశారు సీనియర్ జర్నలిస్ట్ తెలకపల్లి రవి. ఓ యూట్యూబ్ ఛానల్‌కి ఇచ్చిన ఇంటర్వ్యూలో ఆయన మాట్లా డుతూ.. ‘జగన్‌తో పాటు ముందు నుండి ట్రావెల్ చేస్తూ విశ్వాసపాత్రులుగా ఉన్న వారికి ఆయన క్యాబినేట్‌‌లో స్థానం దక్కింది. వారిలో అనర్హులు అనడానికి ఏం లేదు. విధేయత, విశ్వాసపాత్రులుగా ఉన్నవారే ఉన్నారు.

నమ్ముకున్న వాళ్లకు న్యాయం.. తండ్రి బాటలోనే
జగన్ ఆయన తండ్రిలాగే తనను నమ్ముకున్న వాళ్లకు న్యాయం చేస్తారని మరోసారి రుజువు చేసుకున్నారు. పిల్లి సుభాష్ చంద్రబోస్ లాంటి వాళ్లు ఓడిపోయినా మంత్రిని చేశారు. నమ్మిన వారికి కట్టుబడ్డారు. ఇక చాలామందికి మంత్రిపదవులు రాలేదంటున్నారు. అయితే పర్షెప్షన్ వేరు రియాలిటీ వేరు. టీవీల్లో కనిపించే వాళ్లు (రోజా, అంబటి), హడావిడి చేసి ఎక్కువ ప్రచారంలో ఉన్నవాళ్లే అధిష్ఠానానికి నచ్చుతారని చెప్పలేం. పెర్ఫామెన్స్‌తో పాటు చాలా కోణాలు ఉంటాయి. సీనియారిటీ కూడా ఈ కోణాల్లో ఒకటి.

నెంబర్ 2 ఉండదు.. ఒకటి తరువాత ఆరుతో మొదలు..
ఇక జగన్ కేబినేట్‌లో ఆశ్చర్యకరమైన విషయం ఏంటంటే.. ఐదుగురు ఉప ముఖ్యమంత్రులు ఉండటమే. దీన్ని బట్టి ఒకటో నెంబర్‌లో ఒకటే (జగన్) ఉంటారు. రెండో నెంబర్‌లో ఐదుగురు ఉంటారు. దీన్ని బట్టి రెండో నెంబర్ ఉండదు. దాని ప్రాక్టికల్ ఇంపాక్ట్ ఏంటంటే.. రెండో నెంబర్ దాదాపు లేనట్టే. ఒకటి తరువాత ఆరో నంబర్‌ నుండి మొదలౌతుంది. ఇక నెంబర్ 2 అంటే రామారావు గారు ఒప్పుకునే వారు కాదు. నాదెండ్ల చెప్పుకునే వారు కాని నెంబర్ 2 అని.. రామారావుగారు ఎప్పుడూ ఒప్పుకునే వారు కాదు.

సర్వము తానైనవాడుగా జగన్ క్యాబినేట్..
సూటిగా చెప్పాలంటే.. ఇది జగన్ కేంద్రిత మంత్రివర్గం. సర్వము తానైనవాడు అన్నట్టుగా మొత్తం జగన్‌దే. ఆయన రెక్కల కష్టం అన్నట్టుగా పాలనా పరమైన విషయాలు పూర్తిగా తన నిర్ణయం మేరకే జరుగుతాయని సంకేతం ఇచ్చారు. ఇప్పుడు ఐదుగురు ఉప ముఖ్యమంత్రులు అన్నప్పుడు ఏ ఒక్కరికీ పెద్దగా ప్రాధాన్యం ఉండదు. కాని సింబాలిక్‌గా అన్ని తరగతుల వారికి సమన్యాయం చేశానని చెప్పొచ్చు.

బాబుకి ఇద్దరు.. జగన్‌కి ఐదుగురు..
చంద్రబాబు కూడా ఇద్దరికి ఉప ముఖ్యమంత్రి పదవి ఇచ్చారు. ఇది ఇద్దరికిస్తే ఏంటి? ఐదుగురికి ఇస్తే ఏంటి? ఇంకా చెప్పాలంటే.. ఇది హాఫ్ టర్మ్ మినిస్ట్రీ.. మళ్లీ ఎవరికి అవకాశం ఉంటుందో లేదో తెలియదు. ఎవరికీ కూడా ఈ ప్రభుత్వం నాది.. నేను అంతా అనుకోవడానికి లేకుండా పార్టీ నేను ముఖ్యమంత్రి ప్రధానం అన్న పద్దతిలో రెండున్నరేళ్ల మంత్రి వర్గం పెట్టారు’ అంటూ ఆసక్తికర కామెంట్స్ చేశారు తెలకపల్లి రవి.