వనపర్తి: రెండు కార్లు ఢీకొని ఏడుగురి దుర్మరణం

తెలంగాణలో ఘోర రోడ్డు ప్రమాదం జరిగింది. జాతీయ రహదారిపై రెండు కార్లు ఢీకొని ఏడుగురు దుర్మరణం చెందారు. వనపర్తి జిల్లా కొత్తకోట మండలం కనిమెట్ట వద్ద బుధవారం ఉదయం ఈ ప్రమాదం చోటుచేసుకుంది. హైదరాబాద్ నుంచి కర్నూలు వెళ్తున్న ఓ కారు వేగంగా డివైడర్‌ను ఢొకొట్టింది. దీంతో అదుపుతప్పి అవతలి రోడ్డుపై ఎదురుగా వస్తున్న మరో కారుపైకి దూసుకెళ్లింది. దీంతో రెండు కార్లలో ప్రయాణిస్తున్న ఏడుగురు మరణించారు. మరో నలుగురు తీవ్రంగా గాయపడ్డారు. ప్రమాద సమయంలో రెండు కార్లలో మొత్తం 11 మంది ఉన్నట్లు తెలుస్తోంది.

ఈ ప్రమాదంతో జాతీయ రహదారి భయానకంగా మారింది. రెండు కార్లు నుజ్జునుజ్జువడంతోపాటు కొన్ని మృతదేహాలు వాటిలో ఇరుక్కుపోయాయి. మృతుల్లో ఇద్దరు మహిళలు ఉన్నారు. సమాచారం అందుకున్న పోలీసులు ఘటనాస్థలానికి చేరుకుని దర్యాప్తు చేపట్టారు. గాయపడిన వారిని మహబూబ్‌నగర్ జిల్లా ఆసుపత్రికి తరలించారు.