ఊడిపోయిన ఆర్టీసీ బస్సు ముందు చక్రాలు.. తప్పిన పెను ప్రమాదం

గతవారం జరిగిన కొండగట్టు బస్సు ప్రమాద ఘటనను ప్రజలు మరిచిపోకముందే తెలంగాణలో మరో ప్రమాదం చోటుచేసుకుంది. వేగంగా వెళుతున్న ఆర్టీసీ బస్సు ముందు చక్రాలు ఒక్కసారిగా ఊడిపోయాయి నేలకు రాసుకుంటూ పక్కకు ఒరిగిపోయింది. ఆదివారం ఉదయం నాగర్‌కర్నూలు జిల్లా బిజినేపల్లి వద్ద ఈ ప్రమాదం చోటుచేసుకుంది. ఆ సమయానికి బస్సులో 100 మంది దాకా ప్రయాణీకులు ఉన్నారు. యాదగిరిగుట్ట డిపోకు చెందిన బస్సు నాగర్‌కర్నూలు జిల్లాలోని వట్టెంపాడు గ్రామ సమీపానికి రాగానే ఒక్కసారిగా ముందున్న రెండు చక్రాలు ఊడిపోయాయి. దీంతో డ్రైవర్ సమయస్ఫూర్తిగా వ్యవహరించి బ్రేకులు వేయడంతో బస్సు పక్కనే ఉన్న చెట్టును ఢీకొట్టి పొలాల్లోకి దూసుకెళ్లింది.

బస్సులో 105 మంది ప్రయాణికులు ఉండగా, ఈ ఘటనలో 15 మంది గాయపడ్డారు. హైదరాబాద్ నుంచి వనపర్తికి బయలుదేరిన బస్సు వివిధ ప్రాంతాల్లో ఎక్కిన ప్రయాణికులతో కిక్కిరిసిపోయింది. దీనికి తోడు ఆదివారం వీఆర్వో పరీక్ష ఉండటంతో చాలా మంది అభ్యర్థులు బస్సు టాప్‌ పైకి ఎక్కారు. సుమారు 30 మంది వరకు ప్రయాణికులు టాప్‌పైకి ఎక్కి కూర్చున్నారు. ఇదే సమయంలో బస్సు ముందర రెండు టైర్లు పేలిపోయాయి. బస్సు కుదుపులకు లోను కావడంతో టాప్‌ పైన ఉన్న వారిలో సుమారు 15 మందికి పైగా కిందపడి గాయపడ్డారు. లోపల ఉన్న కొందరు ప్రయాణికులకు స్వల్ప గాయలయ్యాయి. క్షతగాత్రులను నాగర్‌కర్నూలు ఏరియా ఆస్పత్రికి తరలించి చికిత్స అందిస్తున్నారు. వీరిలో ఐదుగురి పరిస్థితి విషమంగా ఉండటంతో హైదరాబాద్‌ నిమ్స్‌కు తరలించారు.

ప్రమాద సమాచారం తెలుసుకున్న పోలీసులు, అధికారులు అక్కడకు చేరుకుని సహాయక చర్యలు చేపట్టారు. క్షతగాత్రులను వైద్యం కోసం ఆసుపత్రికి తరలించారు. బస్సు హైదరాబాద్‌ నుంచి వనపర్తి వెళ్తుండగా ఈ ఘటన చోటుచేసుకుంది. కొండగట్టు ఘటన తర్వాత కూడా ఆర్టీసీ బస్సుల ఫిట్‌నెస్ అధికారులు దృష్టి సారించకపోవడంపై విమర్శలు వెల్లువెత్తుతున్నాయి. జగిత్యాల జిల్లా కొండగట్టులో ఇటీవల జరిగిన రోడ్డు ప్రమాదంలో 63 మంది ప్రాణాలు కోల్పోయిన సంగతి తెలిసిందే.