సిస్టర్ నివేదితా స్కూల్లో షార్ట్ సర్క్యూట్

హైదరాబాద్‌లోని అమీర్‌పేటలో గల సిస్టర్ నివేదిత స్కూల్‌లో మంగళవారం షార్ట్ సర్క్యూట్ ఏర్పడింది. ప్రత్యక్ష సాక్షుల కథనం ప్రకారం.. స్కూల్లోని నర్శరీ తరగతిలో షార్ట్ సర్క్యూట్ ఏర్పడి ఒక్కసారిగా పొగలు వచ్చాయి. దీంతో, ఉపాధ్యాయులు, యాజమాన్యం వెంటనే అప్రమత్తమై విద్యార్థులందరినీ భవనం నుంచి బయటకు తీసుకొచ్చేశారు.

మంటలు ఏర్పడకుండా స్కూల్‌కు విద్యుత్ సరఫరా నిలిపేసి, పొగలను అదుపు చేశారు. పిల్లలను సమయానికి బయటకు తీసుకెళ్లడంతో పెద్ద ప్రమాదం తప్పినట్లైంది. ఈ సమాచారం తెలియగానే పిల్లల తల్లిదండ్రులు విద్యార్థులను ఇళ్లకి తీసుకెళ్లారు. ప్రమాదాన్ని వెంటనే పసిగట్టి అదుపులోకి తీసుకొచ్చామని, ఎలాంటి ఆందోళన చెందవద్దని సిస్టర్ నివేదిత స్కూల్ యాజమాన్యం వెల్లడించారు. ఇటీవల కూకట్‌పల్లిలోని న్యూసెంచరీ పాఠశాల విషాదం తర్వాత విద్యార్థుల తల్లిదండ్రులు పిల్లలను స్కూలుకు పంపించాలన్నా భయపడే పరిస్థితులు నెలకొన్నాయి. ఈ నేపథ్యంలో యాజమాన్యం స్కూలు భవనాల నాణ్యత నుంచి అగ్నిమాపక వ్యవస్థ వరకు ప్రతి ఒక్కటీ ఎప్పటికప్పుడు తనిఖీ చేస్తూ అప్రమత్తంగా ఉండాల్సిన అవసరముంది.