జీఎంసీ మైదానానికి చేరుకున్న పీవీ సింధు

పీవీ సింధు విజయోత్సవ ర్యాలీ గచ్చిబౌలిలోని జీఎంసీ స్టేడియానికి చేరుకుంది. శంషాబాద్ ఎయిర్ పోర్టు నుంచి రహదారుల వెంబడి సింధుని పలకరించేందుకు, శుభాకాంక్షలు తెలిపేందుకు అభిమానులు, ప్రజలు, స్కూలు విద్యార్థులు బారులు తీరారు. అందరి మన్ననలు అందుకున్న సింధు గచ్చిబౌలి స్టేడియానికి చేరుకుంది. అక్కడ ఆమెకు స్వాగతం పలికేందుకు భారీగా ఏర్పాట్లు జరిగాయి. పేరిణి నృత్యాకారులు, ఒగ్గు డోలు వాయిద్య కళాకారులు తమ కళారూపాలతో ఆమెకు స్వాగతం పలికారు. స్కూలు విద్యార్థులు త్రివర్ణాల్లో ఉన్న బెలూన్లను పట్టుకుని సింధు రాగానే ఆనందంతో గాలిలోకి వదిలారు. అనంతరం పూలతో అలంకరించిన ఓపెన్ టాప్ జీపులో ఆమె స్టేడియంలో ట్రాక్ మీద తిరుగుతూ... వచ్చిన వారందరికీ అభివాదం తెలిపింది. కొన్ని నిమిషాల్లో స్టేడియంలో ఏర్పాటు చేసిన సభలో తెలంగాణ ప్రభుత్వం ఆమెను సత్కరించబోతోంది. అనంతరం రూ.5కోట్ల నజరానాను అందించనున్నారు. మంత్రి కేటీఆర్ ప్రసంగించనున్నారు.