కేపీహెచ్‌‌బీ: షార్ట్ సర్య్కూట్‌తో టెక్కీ మృతి

ఇంట్లో జరిగిన షార్ట్‌సర్క్యూట్ వల్ల సాఫ్ట్‌వేర్ ఇంజినీర్ ప్రాణాలు కోల్పోయిన ఘటన కేపీహెచ్‌బీ కాలనీ పోలీస్ స్టేషన్ పరిధిలో శుక్రవారం చోటుచేసుకుంది. పోలీసులు తెలిపిన వివరాల ప్రకారం నెల్లూరు జిల్లా ఉదయగిరి మండలం వడ్లమూడుపల్లికి చెందిన పావులూరి సురేశ్‌ (29) అమీర్‌పేట్‌లో సొంతంగా సాఫ్ట్‌వేర్ సంస్థను నిర్వహిస్తున్నాడు. గత రెండేళ్లుగా కేపీహెచ్‌బీ ఫేజ్‌-7లో నివాసముంటున్నాడు. అయితే, గత మూడు రోజుల నుంచి సురేశ్‌‌ తల్లిదండ్రులు ఆయనతో మాట్లాడేందుకు ప్రయత్నించగా తన మొబైల్‌ స్పందించలేదు. దీంతో కూకట్‌పల్లి సంగీత్‌ నగర్‌లో ఉంటున్న సురేశ్ మేనమామకు ఈ విషయం తెలియజేశారు. అతడ్ని సురేశ్‌ గురించి తెలుసుకోమని చెప్పారు. ఆయన శుక్రవారం ఉదయం అక్కడకు వెళ్లి చూసేసరికి గదికి లోపల నుంచి గడియ పెట్టి ఉంది. ఇదే విషయం ఇంటి యజమానికి చెప్పి గది తలుపులు తెరవడానికి ప్రయత్నించారు.

తలుపు తెరచుకోకపోవడంతో వారు పోలీసులకు సమాచారం అందజేశారు. దీంతో కేపీహెచ్‌బీ పోలీసులు సంఘటనా స్థలికి చేరుకొని బలవంతంగా తలుపులను పగలగొట్టారు. గది లోపలికి వెళ్లి చూసేసరికి సురేశ్‌ విగతజీవిగా పడి ఉన్నాడు. ఒంటిపై టవల్‌ చుట్టుకొని ఉండటం.. లోపల నుంచి తలుపు గడియ పెట్టుకోవడంతోపాటు అక్కడున్న ఆధారాలను బట్టి సురేశ్ షార్ట్‌సర్క్యూట్‌తోనే మృతి చెందినట్లుగా ప్రాథమికంగా నిర్ధరించారు. దీనిపై కేసు నమోదు చేసిన పోలీసులు దర్యాప్తు చేపట్టారు. మృతదేహాన్ని పోస్టుమార్టం కోసం గాంధీ ఆస్పత్రికి తరలించినట్లు పోలీసులు చెప్పారు. కుమారుడు హఠాన్మరణంతో సురేశ్ తల్లిదండ్రులు కన్నీరుమున్నీరుగా విలపిస్తున్నారు.