పండగ బొనాంజా.. ప్లాట్‌ఫాం టిక్కెట్‌ రేట్ డబుల్!

పండగ నేపథ్యంలో దక్షిణ మధ్య రైల్వే ఓ షాక్ ఇచ్చింది. సికింద్రాబాద్‌ రైల్వే స్టేషన్‌లో ప్లాట్‌ఫాం టికెట్‌ ధర భారీగా పెంచుతూ నిర్ణయం తీసుకుంది. ప్రస్తుతం రూ.10గా ఉన్న ఈ టికెట్ ధరను ఏకంగా రూ.20కి పెంచేశారు. ఈ ధరల పెంపు గురువారం (సెప్టెంబర్ 21) నుంచి అక్టోబర్‌ 13 వరకు అమల్లో ఉంటుందని అధికారులు తెలిపారు. దసరా, దీపావళి వరస సెలవుల నేపథ్యంలో రైల్వే శాఖ ఈ నిర్ణయం తీసుకుంది.

మామూలుగానే రద్దీగా ఉండే సికింద్రాబాద్ రైల్వే స్టేషన్.. పండగ సమయాల్లో జనంతో కిక్కిరిసిపోతుంది. ప్రయాణికుల సంఖ్యకు సమానంగా వారిని సాగనంపేవారూ ఉంటారు. దీంతో రైల్వే స్టేషన్‌పై ఒత్తిడి విపరీతంగా పెరుగుతుంది. ఈ ఒత్తిడిని తగ్గించడం ఈ టికెట్ పెంపు నిర్ణయానికి ఒక కారణం కాగా.. ప్రత్యేక వడ్డింపు ద్వారా అదనపు ఆదాయం సమకూర్చుకోవడం మరో కారణం.