ముస్లింల కోసం ప్రత్యేక ఇండస్ట్రియల్, ఐటీ కారిడార్లు..

సీఎం కేసీఆర్.. ముస్లింల కోసం మరిన్ని కార్యక్రమాలు ప్రకటించారు. ముస్లింల కోసం ప్రత్యేక ఇండస్ట్రియల్, ఐటీ కారిడార్లను ఏర్పాటు చేయనున్నట్లు తెలిపారు. అంతర్జాతీయ స్థాయిలో హైదరాబాద్ ఇంటర్నేషనల్ ఇస్లామిక్ కల్చరల్ కన్వెన్షన్ సెంటర్‌ను ఏర్పాటు చేస్తామని చెప్పారు. మైనార్టీ యువకులకు పూర్తి రాయితీతో రూ. 2 లక్షల ఆర్థిక సాయం అందించాలని నిర్దేశించారు. బ్యాంకులతో సంబంధం లేకుండా ఈ ఆర్థిక సాయం చేయాలని అధికారులకు కేసీఆర్ సూచించారు. మైనార్టీ సంక్షేమంపై ఆయన సోమవారం (అక్టోబర్ 23) ప్రగతి భవన్‌లో సమీక్ష నిర్వహించారు.

అభివృద్ధి, సంక్షేమ కార్యక్రమాల్లో మైనార్టీలు లబ్ధి పొందేలా కార్యాచరణ ఉండాలని అధికారులకు కేసీఆర్ సూచించారు. మైనార్టీల సంక్షేమానికి మరింత శ్రద్ధతో పని చేయాలని ఆయన ఆదేశించారు. కోకాపేటలో 10 ఎకరాల్లో హైదరాబాద్ ఇంటర్నేషనల్ ఇస్లామిక్ కన్వెన్షన్ సెంటర్ నెలకొల్పుతామని, 3 వారాల్లోగా ఈ సెంటర్ నిర్మాణ పనులు ప్రారంభం కావాలని ఆయన అధికారులకు ఆదేశాలు జారీ చేశారు.

ఈ సమావేశం అనంతరం ముఖ్యమంత్రి కేసీఆర్‌ అధ్యక్షతన తెలంగాణ మంత్రివర్గ భేటీ ప్రారంభమైంది. త్వరలో ప్రారంభం కానున్న శీతాకాల సమావేశాలు, బిల్లులు, తీర్మానాలపై ఈ సమావేశంలో చర్చించనున్నారు. నూతన పంచాయతీ రాజ్‌ చట్టం, ప్రైవేట్ విశ్వ విద్యాలయాలు, వివిధ శాఖల్లో పోస్టుల భర్తీపై ఈ భేటీలో చర్చించనున్నట్లు తెలుస్తోంది.